АҚШнинг F-16 қирувчи самолёти Германиядаги авиабазада ҳалокатга учради

АҚШга тегишли F-16 қирувчи самолёти Германия ғарбида жойлашган Spangdahlem ҳарбий-ҳаво базаси яқинида сешанба куни ҳалокатга учради. Бу ҳақда АҚШ ҳарбийлари маълум қилди.

Ҳодиса оқибатида самолётда бўлган бир нафар учувчи катапульта орқали хавфсиз чиқиб улгурган. Учувчи тиббий ёрдам олиш учун шифохонага олиб кетилган.

Ҳарбийлар маълумотига кўра, ҳалокат сабаблари ҳозирча номаълум. Ҳодиса жойида фавқулодда вазиятларга жавоб бериш хизматлари иш олиб бормоқда.

Маълум қилинишича, F-16 самолёти тўртта қирувчи самолёт иштирокидаги режали ўқув парвозидан сўнг Spangdahlem авиабазасига қайтиб келаётган бўлган.

Қолган учта F-16 самолёти Ramstein авиабазасига йўналтирилган ва у ерга хавфсиз қўнган.
Ҳодиса юзасидан текширув бошланган.

Муаллиф: Ҳасанбой ОЧУН