Ўзбекистон ва Озарбайжон ўртасидаги стратегик ҳамкорлик: янги босқич сари йўл

Ўзбекистон ва Озарбайжон ўртасидаги икки томонлама муносабатлар сўнгги йилларда янги босқичга кўтарилмоқда. Расмий манбаларга кўра, томонлар сиёсий, иқтисодий, маданий ва гуманитар йўналишларда чуқур ва кенг қамровли ҳамкорликни йўлга қўйган. Олий даражадаги мунтазам учрашувлар, ҳамкорлик дастурлари ва имзоланган ҳужжатлар икки мамлакат ўртасидаги алоқаларнинг мустаҳкам асосга эга эканини кўрсатмоқда.

Сиёсат

11.06.2025, 17:19

Lotinchada

Улашиш:

Oʻzbekiston va Ozarbayjon oʻrtasidagi strategik hamkorlik: yangi bosqich sari yoʻl

Foto: Azertac

Жорий йил икки мамлакат ўртасида дипломатик алоқалар ўрнатилганининг 30 йиллиги билан аҳамиятли бўлмоқда. Шу давр мобайнида Ўзбекистон ва Озарбайжон ўртасидаги муносабатлар изчил ва ҳар томонлама ривожланди. Сўнгги уч йил ичида Президентлар Шавкат Мирзиёев ва Илҳом Алиев ҳар бири беш маротаба ўзаро ташриф буюргани бу алоқаларнинг доимийлик ва стратегик характерга эга эканини тасдиқлайди.

2024 йилда икки давлат ўртасида "Стратегик ҳамкорлик тўғрисида шартнома" имзоланди. Бу ҳужжат Ўзбекистон-Озарбайжон алоқаларини янги босқичга олиб чиқди. Президент Шавкат Мирзиёевнинг яқин кунларда яна Озарбайжонга ташриф буюриши режалаштирилган.

Савдо-иқтисодий ҳамкорлик соҳасида ҳам сезиларли ютуқларга эришилмоқда. 2024 йилда икки томонлама савдо ҳажми 41 фоизга ошди, йилнинг биринчи чорагида эса бу кўрсаткич ўтган йилга нисбатан уч баравар кўпайди. Июнь ойида Озарбайжонда Ҳукуматлараро қўшма комиссиянинг 14-йиғилиши бўлиб ўтиши режалаштирилмоқда. 2024–2025 йилларга мўлжалланган иқтисодий ва инвестицион ҳамкорлик бўйича "Йўл харитаси" муваффақиятли амалга оширилмоқда.

Озарбайжон-Ўзбекистон Инвестиция жамғармаси доирасида таълим, қурилиш материаллари, тўқимачилик, логистика, енгил саноат ва озиқ-овқат соҳаларини қамраб олган 10 дан ортиқ истиқболли лойиҳа кўриб чиқилмоқда. Саноат кооперацияси йўналишида ҳамкорлик кенгайтирилиб, қайта тикланувчи энергия бозорида Озарбайжон, Ўзбекистон ва Қозоғистоннинг Европага "яшил энергия" етказиб бериш ташаббуси илгари сурилган.

Озарбайжоннинг Арманистон босқинидан озод қилинган ҳудудларида Ўзбекистон томонидан Фузули шаҳрида Мирзо Улуғбек номидаги мактаб қурилмоқда. Хонқандида тикувчилик фабрикасининг очилиши эса икки давлат раҳбарларининг иштирокида бўлиб ўтди.

Транспорт-транзит соҳасида ҳам сезиларли ютуқларга эришилмоқда. 2024 йилда транзит юк ташиш ҳажми 18 фоизга ошди. Ўрта йўлак доирасидаги ҳамкорлик алоҳида аҳамиятга эга бўлиб, Ўзбекистон бу йўналишдан фаол фойдаланишга даъват этилди.

Маданий-гуманитар ҳамкорликда ҳам фаолият давом этмоқда. 2023 йилда Бакуда Ўзбекистон Маданият кунлари, ўтган йили эса Ўзбекистонда Озарбайжон Маданият кунлари бўлиб ўтди. Ҳудудлараро алоқаларнинг кенгайиши доирасида икки давлатнинг 10 шаҳри ўртасида қардошлик шартномалари имзоланди.

Бўлиб ўтган учрашувда пахтачилик кластерлари, ижтимоий ва тижорат объектлари қурилиши, нефть-газ саноати, қишлоқ хўжалиги, молия сектори, таълим, транспорт ва кема қурилиши соҳаларидаги истиқболли лойиҳалар муҳокама қилинди.

Ўзбекистон ва Озарбайжон ўртасидаги кўп қиррали ҳамкорлик икки халқ манфаатларига хизмат қилиб, минтақавий барқарорлик ва тараққиётнинг муҳим омилига айланмоқда.

Сиёсат

11.06.2025, 17:19

Улашиш:

#Ўзбекистон #Озарбайжон #стратегик ҳамкорлик

мавзуга оид янгиликлар