Бухорода қотил она иккинчи фарзандини ҳам ўлдирди

Унда қайд этилишича, асли сурхондарёлик бўлган, бугунги кунда Бухоро шаҳри "Гулшан" маҳалласида истиқомат қилиб келаётган аёл 2021 йилда туғилган фарзандини кўкрак, юз ва бош қисмига уриб, ўлдирган. Аниқланишича, мазкур жиноятни содир этган фуқаро олдин ҳам фарзандини ўлдириб, қамалиб чиққан. 

"Гулшан" маҳалла фуқаролар йиғини раисига кўра, аёл ўзининг олдин содир этган қилмиши учун пушаймондек тутган. Бундан ташқари, унда ҳеч қандай агрессивлик сезилмаган.

"Аёл бизнинг доимий назоратимизда бўлган. Маҳаллага бир неча марта чақирилган. У билан маҳалламизда ишлайдиган ходимлар мулоқотда бўлиб турган. Боласи навбатсиз тарзда тумандаги 25-боғчага қўйилган. Август ойидан бошлаб, ўзининг аризасига биноан бола нафақасини ҳам олишни бошлаган. У билан гаплашганимизда ўзини доим хотиржам тутган. Унда агрессив ҳолатлар кузатилмаган. Биринчи қилган хатосидан хулоса қилган деб биз уни ҳаётга қайтишига ёрдам қилганмиз", дейди маҳалла оқсоқоли.

Шунингдек, боласини ўлдиргани айтилаётган аёлнинг яшаш жойидаги қўшниларининг билдиришича, у уйидан чиқмаган. Одамлар билан кам мулоқот қилган. Ҳатто қўшнилари орасида уни кўрмаганлар ҳам бор.

"Шу жойда истиқомат қиламан, болалар майдончасига ҳар кун оналар фарзандларини олиб чиқиб, ўйнатишади. Лекин мен у аёлни бирор марта кўрмаганман. Бошқа қўшниларимдан сўрасам ўзи бу аёл кўчага кам чиқишини айтишди", дейди қўшни аёллардан бири.

Фуқаро яшаш хонадонинг қаршисидаги уйда турувчи қўшнининг фикрига кўра, аёл у билан бир неча бор суҳбатлашишга уринган, бироқ фуқаро эшигини очмаганлиги учун гаплашолмаган.

"Нега бу аёл доим одамлардан қочади, дея у билан самимий гаплашишга ҳаракат қилиб кўрганман. Уйига бир неча марта овқат олиб чиқдим, аммо эшикни очмагани боис у билан гаплашолмадим. Бақириб боласини уришганда мен болани мактаб ёшида деб ўйлаганман. Чунки у фарзандини сумканг қани, нега кийимингни кир қилдинг дея койирди", дейди нафақа ёшидаги аёл.

Шунингдек, у гапида давом этаркан, аёлни руҳий носоғломликда айблай олмаслигига ҳам тўхталган.

"Аёлнинг руҳий ҳолатини ёмон дейолмайман. Чунки уйидан ортиқча гап-сўз чиқмаган, бироқ ўта қаттиққўл, меҳрсиз она эди. Ижтимоий тармоқларда болани кўрганимда ҳайратландим. Сабаби бола ҳали уч ёшга ҳам тўлмаган экан", дейди қўшниси.

Бош прокуратура матбуот котиби Ҳаёт Шамсутдиновнинг PARADIGMA.UZ'га берган маълумотига кўра, ҳозирда мазкур ҳолат юзасидан Бухоро шаҳар прокуратураси томонидан аёлга нисбатан Жиноят кодексининг 97-моддаси 2-қисми "в" банди билан жиноят иши қўзғатилиб, у ҳимоя ҳуқуқи таъминланган ҳолда ЖПКнинг 221-моддаси тартибида ушланган.