Ўзбекистонда бир марталик пластик маҳсулотларга чеклов қўйилади

17 декабрь куни Олий Мажлис Қонунчилик палатаси мажлисида бир марталик пластик маҳсулотлар муомаласини чеклашга қаратилган қонун лойиҳаси биринчи ўқишда қабул қилинди.

Қонун лойиҳаси экологик тоза ҳудудларнинг ҳуқуқий мақомини белгилаш, атроф-муҳитни муҳофаза қилиш ва табиий объектлар деградациясининг олдини олишни мақсад қилган.

Қонун лойиҳасида нималар назарда тутилмоқда?

• экологик тоза ҳудудларда табиий ландшафт ва экотизимларга зарар етказувчи фаолиятни тақиқлаш;
• табиий органик полимерлардан ташқари бир марталик пластик маҳсулотлар муомаласини чеклаш;
• полиэтилен пакетларнинг атроф-муҳитга салбий таъсирини камайтиришга қаратилган нормаларни жорий этиш.

Пластик чиқиндилар бугунги кунда энг долзарб экологик муаммолардан бири бўлиб, уларнинг узоқ вақт парчаланмаслиги табиатга жиддий зарар етказмоқда.

“Ўзбекистон – 2030” стратегияси доирасида:

Президент фармонига мувофиқ, пластик чиқиндиларни камайтириш учун халқаро амалиётда қўлланиладиган механизмларни жорий этиш режалаштирилган. Жумладан:

• пластик чиқиндиларни йиғиш ва утилизация қилиш учун махсус ускуналар ўрнатиш;
• пластик қадоқ ишлаб чиқарувчи ва импорт қилувчилар учун тарани қайтариш мажбуриятини белгилаш;
• аҳоли томонидан топширилган ҳар бир пластик идиш учун рағбатлантирувчи тўлов механизмини яратиш.

Экология қўмитаси маълумотларига кўра, Ўзбекистонда йилига 10,2 млн тонна қаттиқ маиший чиқинди ҳосил бўлади. Шундан 10,3 фоизи (1,05 млн тонна) пластик чиқиндилардир. Пластик буюмлар ишлаб чиқарувчи корхоналар мамлакатнинг деярли барча ҳудудларида фаолият юритади ва полиэтилен пакетлардан фойдаланиш кенг тарқалган.

Қонун лойиҳаси пластик чиқиндилар ҳажмини камайтириш ва экологик барқарорликни таъминлашга хизмат қилиши кутилмоқда.