Лондон болалар учун ижтимоий тармоқларни тақиқламоқчи

 Бу ҳақда Лондон ҳукумати 19 январь, душанба куни маълум қилди.

Маълумотларга кўра, Британия вазирлари яқин вақт ичида Австралияга ташриф буюриб, ушбу мамлакатда болалар учун ижтимоий тармоқларни тақиқлаш бўйича жорий этилган тажриба билан танишишни режалаштирмоқда. Шунингдек, Лондонда мактабларда мобиль телефонлардан фойдаланиш қоидаларини янада қатъийлаштириш имконияти ҳам кўриб чиқилмоқда.

Қонунлар етарли эмас

Фан, инновациялар ва технологиялар вазири Лиз Кендаллнинг таъкидлашича, амалдаги қонунлар ушбу соҳани тартибга солишда сўнгги ва якуний қарор сифатида қаралмаслиги керак.

«Айнан шу сабабли мен қўшимча чоралар кўришга тайёрман», — деди вазир.

Австралия тажрибаси ўрганилади

Британия ҳукумати Австралия тажрибасини ўрганишни мақсад қилган. Чунки Австралия бир ой олдин дунёда биринчи бўлиб 16 ёшгача бўлган болалар учун ижтимоий тармоқларни тақиқлаган давлатга айланди.

Мутахассислар ва расмийлар болаларнинг смартфонлар ва ижтимоий тармоқларга ҳаддан ташқари берилиб кетиши уларнинг руҳий саломатлигига салбий таъсир кўрсатаётганидан хавотир билдирмоқда. Бундай ташвишлар бошқа давлатларда ҳам кузатилмоқда.

Жумладан, ўтган ҳафта Дания 15 ёшгача бўлган болалар учун ижтимоий тармоқлардан фойдаланишни тақиқлаш режаларини эълон қилди. Европа Иттифоқи даражасида эса Европа комиссияси YouTube ва Snapchat каби платформаларнинг рақамли хизматлар тўғрисидаги қонун (DSA) талабларига, хусусан, вояга етмаганларни ҳимоя қилиш бўйича меъёрларга қай даражада риоя қилаётганини текширишини маълум қилди.