Қирқ мингдан ортиқ фуқарога бир марталик нафақа тўланди

Шулардан:

• 28 минг 700 дан ортиқ ота-она жами 25,6 миллиард сўм миқдорида суюнчи нафақаси олган;
• 11 минг 800 га яқин фуқаро учун эса 22,3 миллиард сўм миқдорида дафн этиш нафақаси тўлаб берилган.

Суюнчи нафақаси — бола туғилгандан кейин 6 ой ичида бериладиган бир марталик тўлов бўлиб, уни боланинг отаси ёки онаси “Халқ банки”нинг исталган филиалига мурожаат қилиб ёки “Хазна” мобил иловаси орқали олишлари мумкин. Агар оила **“Ижтимоий ҳимоя ягона реестри”**да рўйхатдан ўтган бўлса, иккинчи фарзанд учун ҳам суюнчи пули берилади.

Дафн этиш нафақаси эса ФҲДЁ бўлимидан ўлим ҳақидаги гувоҳнома олган шахсга тўланади. Маблағни “Халқ банки” орқали ёки “Хазна” иловаси орқали олиш мумкин. Бироқ мурожаат 60 кундан кечиктирилса ёки фуқаро муомалага лаёқатсиз деб топилган бўлса, нафақа тўланмайди.

Маълумот учун:

• Суюнчи нафақаси — 893 минг сўм;
• Дафн этиш нафақаси — 1 миллион 884 минг сўмни ташкил этади.