Ўзбекистон – АҚШ: икки томонлама битимлар тўплами имзоланди

Тадбирда АҚШ ҳукумати ва молия институтлари вакиллари — савдо вакили Жеймисон Грир, Президентнинг махсус вакили Паоло Замполли, Эксимбанк президенти ва раиси Жон Ёванович, АҚШ – Ўзбекистон савдо палатаси раиси Керолин Лемм ҳамда “Traxys”, “Valmont Industries”, “Gulf Oil”, “Avigen Broiler Breeding Group”, “John Deere”, “BlackRock Financial Markets Advisory”, “Oppenheimer” каби етакчи компаниялар раҳбарлари қатнашди. 

Видеоалоқа орқали Ўзбекистон ҳудудлари раҳбарлари ҳам учрашувда иштирок этди.

“Бугунги кунда шериклар ишончли, қоидалар аниқ-равшан, ҳамкорлик эса узоқ муддатли бўлиши етакчи ўринга чиқмоқда. Биз АҚШ билан ҳамкорлигимизни айнан шу мантиқ асосида қурмоқдамиз”, деди Давлат раҳбари.

Қўшма Штатлар билан ҳамкорликда устувор йўналишлар сифатида хомашё, нефть-кимё, энергетика, қишлоқ хўжалиги, паррандачилик ва бошқа тармоқлар белгиланди.

АҚШ Халқаро молиявий тараққиёт корпорацияси ва Эксимбанкининг битимларга ҳамроҳликдаги роли ортиши алоҳида қайд этилди.

Ҳудудлараро алоқаларни мустаҳкамлаш мақсадида Ўзбекистон ҳудудлари раҳбарларининг АҚШнинг ҳамкор штатларига ташрифлари ташкил этиш топширилди.

Давлат раҳбари ҳузурида қуйидаги соҳалар бўйича икки томонлама ҳужжатлар имзоланди:

• ёқилғи қуйиш шохобчалари тармоғини қуриш;
• ёмғирлатиб суғориш технологияларини жорий этиш;
• муҳим минералларни қазиб олиш ва етказиб бериш;
• паррандачилик кластерини ташкил этиш;
• агросаноат ва молия бозорини ривожлантириш;
• инвестиция муҳитини яхшилаш.