Трамп мусулмонларни Рамазон билан табриклади

Оқ уй 17 февраль куни Исломнинг энг муқаддас ойи бошланиши муносабати билан баёнот эълон қилди.

Трамп табрик нутқини: “Бугун Рамазонни нишонлаётган барча инсонларга самимий салом ва эзгу тилакларимни йўллайман”, – деб бошлаган.

Трамп миллионлаб америкалик мусулмонлар Рамазонни ибодат ва рўза орқали ўтказишини таъкидлади. Шунингдек, бу ой оилавий ва жамоат алоқаларини мустаҳкамлаши, раҳмдиллик, саховат, шафқат ва камтарлик каби қадриятларни тасдиқлашини қайд этди.

Президент ўз маъмуриятининг диний эркинликни ҳимоя қилишдаги содиқлигига алоҳида урғу бериб: “Худо томонидан инъом этилган эмин-эркин ибодат қилиш ҳуқуқи миллатимизнинг фарқловчи белгиси, фаровонлигимиз ва қудратимизнинг асосий устуни ҳисобланади. Шу сабабли ҳар куни менинг маъмуриятим барча фуқароларнинг ўз эътиқодини амалга ошириши, виждонига амал қилиши ва эркин ибодат қилишини таъминламоқда", деди табрик баёнотида.

Табрик тинчлик ва ҳамжиҳатлик учун қилинган тилаклар билан якунланган:

“Ушбу марҳамат ва эзгулик мавсуми пайтида мен оилаларга бахт-саодат, бутун дунёга бирдамлик ва тинчлик ҳамда келаётган йилда барака ва фаровонлик тилаб дуо қиламан”.