Россияда МДҲ давлатларидаги рус тили ўқитувчилари учун махсус таълим дастури яратилди

Ушу ташаббус Россия Федерацияси Таълим вазирлиги кўмагида "Моя история" ("Менинг тарихим") жамғармаси томонидан амалга оширилган. Мазкур малака ошириш дастури ўзбекистонлик ўқитувчилар учун А.И. Герцен номидаги Россия давлат педагогика университети билан ҳамкорликда ишлаб чиқилган. 

Тадбирда иштирок этганлар 

Дастур очилишида РДПУ (Россия Давлат педагогика университети)нинг халқаро фаолият бўйича проректори ўринбосари Сергей Шеремет, "Менинг тарихим" жамғармасининг стратегия ва дастурий фаолият мониторинги департаменти раҳбари ўринбосари Елена Гуляэва, чет эллик фуқаролар учун "Русский дом" ("Рус уйи") тайёргарлик бўлими директори Оксана Чухаева ҳамда Санкт-Петербургдаги Ўзбекистон Республикаси Бош консуллигининг консули Умиджон Болтабоев иштирок этди. 

Тадбир давомида меҳмонлар рус тилини ўқитиш ва таълим бўйича асосий масалаларни муҳокама қилган. Сергей Шеремет халқаро ҳамкорлик ва тажриба алмашишнинг аҳамиятини таъкидлаган бўлса, Елена Гуляэва дастур Россия ва Ўзбекистон ўртасидаги таълим ва маданият соҳасидаги алоқаларни мустаҳкамлашда муҳим аҳамиятга эга эканлигини қайд этган. 

Таълим дастури ва унинг иштирокчилари 

Қайд этилишича, 11-15 ноябрь кунлари бўлиб ўтган дастур доирасида Ўзбекистоннинг етакчи университетларидан 12 нафар рус тили ўқитувчиси қатнашган. Ўқитувчилар рус тилини замонавий ўқитиш методикаларига бағишланган маъруза ва маҳорат дарсларида иштирок этган. Курснинг мақсади — иштирокчиларга янги билим ва амалий кўникмаларни бериш билан бирга, уларнинг маданият ва тарих ҳақидаги тушунчаларини чуқурлаштиришдан иборат. 

Таълим дастурида энг эсда қолган жараён А.И. Герцен номидаги РДПУнинг асосий кампуси ва императрица Мария Фёдоровнага бағишланган фундаментал кутубхона бўйлаб экскурсия бўлган. Бу орқали ўқитувчилар Россия таълими ва илмий фаолиятининг тарихий ривожланиши билан танишиб, мамлакатнинг етакчи педагогик университетининг таълимий ресурсларидан фойдаланиш имкониятига эга бўлди. 

Дастур давомида иштирокчилар рус тилини ўқитишнинг илғор услубларини ўрганган, шунингдек, Россия анъаналари, санъати ва илм-фанига оид қимматли маълумотларга эга бўлган. 

Маълумот учун, мазкур дастур МДҲ давлатларида рус тилини ўрганишни қўллаб-қувватлашга ва халқлар ўртасидаги ўзаро тушунишни чуқурлаштиришга қаратилган кенг кўламли таълим ташаббуслари доирасида ташкил этилди.