«Бу нарса тўхташи керак»: Саида Мирзиёева Қибрайдаги иссиқхонада экологик текширув ўтказди

Президент администрацияси раҳбари Саида Мирзиёева 2 декабрь куни кечқурун экология бўйича махсус комиссия йиғилишида иштирок этгандан сўнг Тошкент вилоятининг Қибрай туманида ўтказилган экологик рейд тадбирларига қўшилди.

Ўзбекистон

03.12.2025, 10:05

Lotinchada На русском языке

Улашиш:

Фото: Кадр из видео

Бу ҳақда у ўзининг Telegram каналида маълум қилди.

Мирзиёевага кўра, рейд давомида тумандаги иссиқхоналардан бири текширилди. Ушбу иссиқхонада ҳар куни 150 килограммга яқин кўмир ёқилиши аниқланган ва бу ҳолат атроф-муҳитга жиддий зарар етказаётгани қайд этилди.

Рейд чоғида Президент администрацияси раҳбари иссиқхона эгаси билан суҳбатлашиб, экологик меъёрларга қатъий риоя қилиш зарурлигини таъкидлади.

«Бизга одамларнинг соғлиги жуда муҳим. Бу нарса тўхташи керак» деди у тадбиркор билан мулоқот чоғида.

Тадбиркор фильтр ўрнатиш ишлари ҳосил мавсумининг якунланиши туфайли кечикаётганини билдирди. Шундан сўнг Саида Мирзиёева вилоят ҳокими Зойир Мирзаевга мурожаат қилиб масалани тезкор ҳал этишни сўради.

Мирзаевнинг айтишича, тадбиркор учун берилган охирги муддат тугаш арафасида: «Эртага фильтр олиб келинади, сотиб олинади ва ўрнатилади».

Саида Мирзиёева тадбиркорларга зарур ёрдам кўрсатиш муҳим эканини таъкидлаб, зарурат бўлса субсидия бериш масаласини ҳам кўриб чиқиш лозимлигини қайд этди.

«Экологияга етказилаётган зарар моддий манфаат билан оқланмайди. Аҳоли соғлигига зарар ҳар қандай иқтисодий фойдадан устун» деди Мирзиёева.

Хабарга кўра, Экология қўмитасига бир кун ичида мазкур иссиқхонага замонавий фильтр ўрнатиш вазифаси юклатилди. Шунингдек, тадбиркорлар учун семинар-тренинг ва фильтрлар савдо-кўргазмаси ташкил этилиши белгилаб қўйилди.

Ўзбекистон

03.12.2025, 10:05

Улашиш:

#экология #Саида Мирзиёева #Рейд

мавзуга оид янгиликлар