Россия Ғарбнинг Марказий Осиёдаги нодир ер металларига қизиқишидан хавотирда

Россия ташқи ишлар вазири ўринбосари Михаил Галузин Ғарб давлатларининг минтақадаги иқтисодий ва стратегик фаоллиги Москва учун жиддий ташвиш уйғотаётганини айтди.

Унинг таъкидлашича, Вашингтон муҳим минераллар ва нодир ер металлари бўйича келишувларни фаол тарзда илгари сурмоқда.

“Бу шунчаки иқтисодий рақобат эмас, балки Россияни сиқиб чиқариш ва чегараларимиз яқинида Ғарб назоратидаги инфратузилмани шакллантиришга уринишдир”, — деди Галузин.

Нодир ер элементлари учун геосиёсий кураш кучаймоқда

Нодир ер металлари электромобиллар, қайта тикланувчи энергетика, микрочиплар ва мудофаа технологиялари ишлаб чиқаришда стратегик аҳамиятга эга ҳисобланади.

Ҳозирда мазкур бозорда Хитой етакчилик қилмоқда. Шу сабаб G7 давлатлари, жумладан АҚШ ва Европа Иттифоқи, Хитойга қарамликни камайтириш учун янги манбалар изламоқда.

Бу жараёнда Ўзбекистон, Қозоғистон Қирғизистон, Тожикистон ва Туркманистон  катта ресурс салоҳияти туфайли диққат марказига айланган.

Ўзбекистон ва АҚШ меморандум имзолаган

Жорий йил февраль ойида Ўзбекистон ва АҚШ ҳукуматлари ўртасида муҳим фойдали қазилмалар ҳамда нодир ер элементларини қазиб олиш ва қайта ишлаш соҳасида таъминот барқарорлиги бўйича англашув меморандуми имзоланган эди.

Марказий Осиё яқин йилларда АҚШ, Хитой ва Россия ўртасидаги стратегик рақобатнинг муҳим нуқталаридан бирига айланиши мумкин.