Украинанинг Эрон кемасига ҳужуми жавобсиз қолмайди – Аббос Ароқчи

Эрон ташқи ишлар вазири Аббос Ароқчи 26 июл куни Украинанинг Эрон савдо кемасига қилган ҳужуми жавобсиз қолмаслигини айтди.

Эроннинг маълум қилишича, Каспий денгизидаги ҳужум оқибатида юз берган портлашда бир денгизчи ҳалок бўлиб, бир киши жароҳатланган.

Ароқчи бу фикрларни Европа Иттифоқининг ташқи сиёсат бўйича раҳбари Кая Каллас ва Россия ташқи ишлар вазири Сергей Лавров билан телефон суҳбатларида билдирганини Х ижтимоий тармоғида маълум қилди.

Россия Ташқи ишлар вазирлиги сайтида эълон қилинган баёнотда Лавров ҳужумда денгизчининг ҳалок бўлгани муносабати билан ҳамдардлик билдирди.

Лавровнинг қайд этишича, Ароқчи кема ўз сафарини бошлаган Россиянинг Астрахан вилояти маҳаллий ҳукуматига экипажга кўрсатган ёрдами учун миннатдорлик билдирган ва “Киев режимининг бундай саргузаштларига чек қўйиш зарурлигини” таъкидлаган.

Шунингдек, баёнотда Ароқчининг Лавровга “Яқин Шарқдаги кескинликни юмшатишга қаратилган дипломатик саъй-ҳаракатлар давом этаётгани” ҳақида маълумот бергани айтилади.

Зеленский нима деди?

Ушбу ҳодиса Украина президенти Володимир Зеленский Х ижтимоий тармоғида узоқ масофали зарбалар натижасида Каспий денгизида муҳим натижалар қўлга киритилганини ёзганидан сўнг юз берди.

Унинг айтишича, Украина кучлари Эрон иштирокидаги ҳарбий юк ташишда фойдаланилган кемалар ҳамда битта ҳарбий кемага зарба берган. Бироқ Зеленский Теҳрон тилга олган савдо кемасини нишонлардан бири сифатида тилга олмади.

Шунингдек, Зеленский Россияни Эронга Форс кўрфази давлатлари ва АҚШнинг ҳарбий объектларига оид сунъий йўлдош тасвирларини узатишда айблади. Унинг сўзларига кўра, 19–20 июл кунлари Баҳрайн, Иордания ва Қувайтдаги авиабазалар кузатилган.

Эрон ва Украина ўртасидаги зиддият

Эрон ва Украина ўртасидаги муносабатлар 2022 йилдан буён кескинлашган. Бунга Эрон Россияга Шаҳед дронларини етказиб бергани сабаб бўлган. Москва ушбу дронлардан Украина шаҳарларига минглаб ҳужумлар уюштиришда қўллаган.

Киев маълумотларига кўра, Россия босқини бошланганидан бери Украина ҳаво мудофааси 44 мингдан ортиқ Эрон лойиҳасидаги дронни уриб туширган.

Украина, шунингдек, АҚШ–Эрон уруши вақтида Эрон ҳужумларига учраган Форс кўрфази давлатларига ўзининг дронларга қарши технологиялари ва тажрибасини тақдим қилган, хусусан, Қатар, БАА, Саудия Арабистони ва Қувайтга дронларга қарши кураш бўйича мутахассисларни юборган.