Зеленскийнинг таклифи Путинга етказилди – Кремл

Жума куни Кремл матбуот котиби Дмитрий Песков “Известия” нашрига Украина президенти Володимир Зеленскийнинг очиқ мурожаати ҳақида Россия президенти Владимир Путин хабардор қилинганини маълум қилди.

“Ҳа, кечасиёқ биз (Путинга) унинг ёзма нусхасини топширдик. Оммавий ахборот воситаларидан келган маълумот президентга етказилди ва у буни кўриб чиқади. Президентга ахборот берилди”, — деди Песков.

Зеленский пайшанба куни Путинга очиқ хат эълон қилди. Унда урушни тугатиш бўйича келишиб олиш учун учрашишни таклиф этиб, акс ҳолда Киев курашни давом эттиришга тайёр эканидан огоҳлантирди.

Шунингдек, Путинни масхара қилиб, россияликлар ҳам ундан, ҳам урушдан чарчаётганини айтди.

Песковнинг сўзларига кўра, Путин жума куни тушдан кейин нутқ сўзлаши кутилаётган Санкт-Петербург халқаро иқтисодий форуми ялпи мажлисида ушбу хат юзасидан изоҳ бериши мумкин.