Франция – асосий фаворит, Ўзбекистон эса дебютантлар орасида энг юқори баҳоланди

Рейтингда Франция чемпионлик учун асосий фаворит сифатида кўрсатилган бўлса, Ўзбекистон дебютантлар орасида энг юқори ўринни эгаллади.

Мексика, АҚШ ва Канада мезбонлигида ўтадиган 2026 йилги Жаҳон чемпионати тарихдаги энг йирик мундиалга айланади. Илк бор мусобақада 48 та терма жамоа иштирок этади. Шу муносабат билан спорт таҳлилчилари турнир бошланишидан олдин жамоаларнинг куч-қудрати ва салоҳиятини баҳолаб чиқди.

Рейтингга кўра, иштирокчилар бир нечта шартли тоифага ажратилган.

Ўзбекистон ўрта поғонада, аммо дебютантлар орасида етакчи

Таҳлилчилар Ўзбекистон миллий терма жамоасини умумий рейтингда 31-ўринга жойлаштирган. Бу кўрсаткич жамоани мусобақадаги асосий аутсайдерлар қаторига эмас, балки плей-офф учун курашиши мумкин бўлган жамоалар сафига киритади.

Муаллифлар Ўзбекистоннинг асосий устунлиги сифатида мустаҳкам ҳимоя чизиғини қайд этган. Шунингдек, Англия Премьер-лигасининг амалдаги чемпиони бўлган «Манчестер Сити» клубида тўп сураётган Абдуқодир Ҳусанов жамоанинг асосий юлдузи сифатида тилга олинган.

Рейтинг муаллифига кўра, Ўзбекистон Жаҳон чемпионатида илк бор иштирок этаётган жамоалар орасида энг кучлиси ҳисобланади.

Аутсайдерлар ва сюрприз қилишга қодир жамоалар

Рейтингнинг қуйи қисмида Кюрасао, Гаити, Ироқ, Иордания, Жанубий Африка Республикаси ва Янги Зеландия каби жамоалар жой олган. Таҳлилчилар фикрича, ушбу терма жамоалар учун гуруҳ босқичидан чиқишнинг ўзи катта муваффақият бўлади.

Шу билан бирга, Швеция, Жанубий Корея, Канада, Швейцария, Мексика, Сенегал ва Туркия каби жамоалар «қора отлар» сифатида баҳоланмоқда. Улар қулай қуръа ва барқарор ўйин орқали мусобақанинг кейинги босқичларигача етиб бориши мумкин.

Марокаш, Япония, Норвегия, Колумбия ва Эквадор эса энг хавфли сюрприз жамоалар сифатида қайд этилган. Таҳлилчилар уларнинг ҳар бири фаворитларга жиддий муаммо туғдириши мумкинлигини таъкидламоқда.

Бразилия ва Германия ҳали ҳам ҳисобдан чиқарилмайди

Рейтингнинг юқори қисмида анъанавий грандлар жойлашган.

Хорватия, Бельгия, Нидерландия, Германия ва Бразилия чемпионлик учун асосий фаворитлар қаторига кирмаган бўлса-да, уларнинг тажрибаси ва салоҳияти юқори баҳоланган.

Таҳлилчилар фикрича, бу жамоаларнинг ҳар бири мусобақа давомида ўз ўйинини топиб олса, финалгача етиб бориш имкониятига эга.

Айниқса, беш карра жаҳон чемпиони Бразилия ва тўрт карра жаҳон чемпиони Германиянинг катта турнирлардаги тажрибаси уларни хавфли рақибга айлантириб туради.

Англия ва Португалия учун ҳал қилувчи чемпионат

Рейтингда Англия бешинчи, Португалия эса тўртинчи ўринга қўйилган.

Муаллифлар бу икки жамоа энг катта босим остида турнирга келаётганини таъкидлаган. Англия сўнгги йилларда Европа чемпионати финалларига чиққан бўлса-да, ҳалигача йирик халқаро мусобақада ғалаба қозона олмаган.

Португалия учун эса бу турнир Криштиану Роналдунинг эҳтимолий сўнгги Жаҳон чемпионати бўлиши мумкин. 41 ёшли ҳужумчи миллий жамоа билан жаҳон чемпионлигига эришиш орқали фаолиятини янада ёрқин якунлашни мақсад қилмоқда.

Асосий фаворитлар — Франция, Испания ва Аргентина

Таҳлилчилар фикрича, 2026 йилги мундиалда чемпионлик учун энг асосий даъвогарлар Франция, Испания ва Аргентина ҳисобланади.

Учинчи ўринга амалдаги жаҳон чемпиони Аргентина жойлаштирилган. Иккинчи ўрин Испанияга берилган бўлса, чемпионлик учун энг юқори эҳтимол Францияга тақдим этилмоқда.

Франция таркибида Килиан Мбаппе бошчилигидаги кучли авлод шаклланган. Испания эса Ламин Ямал, Педри каби ёш юлдузларга таянади. Аргентина эса жаҳон чемпионлигини ҳимоя қилиш учун майдонга тушади.