Ташаббусли бюджетда ғолиб бўлмаган мактабларга ҳам маблағ ажратилади

Мактабгача ва мактаб таълими вазирлиги 2023 йил якуни бўйича ҳисобот матбуот анжумани ўтказди. Paradigma.uz мухбири вазирлик масъулларига охирги пайтларда ижтимоий тармоқларда тарқалаётган ўқитувчи ва ўқувчи ўртасидаги келишмовчилик ҳолатларига вазирлик муносабатини сўради. Бундан ташқари, 2024 йилги давлат бюджетидан Мактабгача ва мактаб таълими вазирлигига ажратилган маблағлар ҳисобидан мактабларни жиҳозлаш учун Ташаббусли бюджет лойиҳасида 1,5 мингдан ортиқ овоз йиғган ва ғолиб бўла олмаган мактабларга алоҳида маблағ ажратилиши белгиланган экан. Бу бўйича ҳам қандай ишлар қилинаётгани ҳақида ҳам жавоб олди.

Мактабгача ва мактаб таълими вазири маслаҳатчиси Азизбек Турдиев ижимоий тармоқларда тарқалаётган мактаблардаги кўнгилсиз ҳолатларга нисбатан "Барча ҳолатлар назоратга олинган, бу бўйича ижтимоий тармоқларда ҳам хабар бериб боряпмиз" мазмунида жавоб берди. Лекин вазирликнинг на расмий сайти, на телеграм саҳифасида ушбу ҳолатларга нисбатан ҳеч қандай муносабат берилмаган. Вазирликнинг ижтимоий тармоқлари фақат ютуқларни кўрсатиш учун очилгандек, гўё.

Ташаббусли бюджет бўйича саволга вазирликнинг Молия ва иқтисод департаменти директори Илҳом Сиражов, давлат бюджети ҳисобидан ажратилган маблағлар мақсадли сарфланаётганини, Ташаббусли бюджет бўйича жиҳозлаш билан боғлиқ лойиҳаларда 1,5 мингдан ортиқ овоз йиғган мактабларга вазирлик томонидан маблағ ажратилишини айтиб ўтди.

Ташаббусли бюджет лойиҳаси якунланишига 1 кун вақт қолди. Ижтимоий тармоқда Самарқандда ўқитувчилар дарсдан озод қилиниб овоз йиғиб юргани акс этган видео тарқалмоқда. Халқ орасида алоҳида мавсумга айланган лойиҳага киритилаётган йўл, касалхона, мактаблар бирламчи эҳтиёж сифатида таъмирлаб берилиши керак эмасми? Таъмирлаб берилмаган тақдирда ҳам ушбу лойиҳага мактаблар ва шифохоналарнинг киритилиши, ҳамда ўқитувчилар, шифокорларнинг овоз йиғишга жалб қилиниши қанчалик тўғри?