Мактаб ошхоналарида баъзи овқатларнинг сотилиши тақиқланди

"Мактаб ошхоналарида тез тайёрланадиган Гамбургер, чизбургер, хот-дог, “кириешки”, “хрустяшки”, чипс, энергетик ва газланган ичимликларни сотиш тақиқланади. Бунга сабаб Жаҳон соғлиқни сақлаш ташкилоти юқоридаги маҳсулотларни кундалик таомномадан чиқаришни тавсия қилган. Бу турдаги маҳсулотлар умумтаълим муассасаларида рухсат этилмайдиган озиқ-овқат ва таомлар рўйхатига киритилди", дейилади хабарда. 

Шунингдек, мактаб ошхоналарида қуйидаги маҳсулотлар тайёрланиши ва сотилиш ҳам мумкин эмас: 

— Гўшт қўшилган, маёнез, кетчуп орасига сабзавотлар солинган нон маҳсулотлари (гамбургер, чизбургер ва хот-доглар); 

— Сунъий таъм, ҳид берувчи моддалар, бўёқлар қўшилган қандолат маҳсулотлари; 

— Сунъий консервантлари бўлган “кириешки”, “хрустяшки” ва чипслар, қурт, писта, донали уй шароитида тайёрланган шимиладиган ширинликлар; 

— Рангли ва рангсиз газланган ичимликлар; 

— Ветеринария назоратидан ўтмаган гўшт, балиқ, паррандалар; 

— Жигар, тил ва юракдан ташқари барча калла-почалар; 

— Ташқи қавати тоза бўлмаган, синган, зарур талабларга жавоб бермайдиган тухумлар; 

— Банкаларнинг герметиклиги бузилган, бомбажли, занглаган, шакли ўзгарган, ёрлиғи бўлмаган ва ишлаб чиқариш вақти ҳамда яроқлилик муддати белгиланмаган, айниқса, уй шароитида тайёрланган ҳар хил турдаги консервалар; 

— Турли аралашмалар ёки омбордаги зараркунандалар билан зарарланган ёрма, ун, қуритилган мевалар ва бошқа маҳсулотлар; 

— Кремли қандолат маҳсулотлари (торт ва пишириқлар); 

— Холодес, парранда ва туёқли ҳайвонлар оёғидан тайёрланган ҳамда калла гўшти рульетлари, ўпка-жигарли ва қондан қилинган колбасалар; 

— Пастеризатсия қилинмаган (флягадаги) творог, термик ишлов берилмаган, идишда сақланган творог ва қаймоқ, қўлбола қатиқ, эпизоотик нохуш хўжаликлардан олинган, шунингдек, дастлабки ишлов берилмаган ва пастеризатсия қилинмаган сут ва сут маҳсулотлари, қимиз ва таркибида этанол бўлган (0,5 фоиздан ортиқ) бошқа ачитилган сутли маҳсулотлар; 

— Қўзиқоринлар ва улардан тайёрланган маҳсулотлар; 

— Хом дудланган гўштли гастрономик маҳсулотлар ва колбасалар, шу жумладан, қайнатилган колбаса; 

— Цирка, хантал, хрен (ерқалампир), ўткир қалампир (қизил, қора) ва бошқа ўткир зираворлар; 

— Ўткир таъмли соуслар, кетчуплар, маёнез, консервалар, маринадланган сабзавот ва мевалар; 

— Табиий қаҳва, тетиклантирувчи ва қувватни оширувчи энергетик ва алкоголь ичимликлар; 

— Пазандалик мойлари, чўчқа ёғи, маргарин ва бошқа гидрогелни ёғлар; 

— Данакли меваларнинг мағзи, сақич, мева ва резаворлилардан тайёрланган яхна ичимликлар ва морслар (термик ишловсиз); 

— Окрошка ва совуқ шўрвалар, ёғда қовурилган тухум, паштет, гўшт ва творогли қуймоқлар; 

Бундан ташқари, тез тайёрланадиган қуруқ озиқ-овқат концентратлари асосидаги биринчи ва иккинчи таомлар мактаб ошхоналарида бўлиши тақиқланган.