Трамп Хитой, Россия ва КХДРни АҚШга қарши “тил бириктириш”да айблади

Баёнот Пекинда Иккинчи жаҳон уруши якунланишининг 80 йиллигига бағишланган йирик ҳарбий парад фонида янгради.

Трамп ўз мурожаатида Хитой раҳбари Си Цзиньпиндан АҚШнинг урушдаги “қон ва қаҳрамонлик” қурбонликлари ҳақида эслаш-эсламаслигини сўради. Унга кўра, кўплаб америкаликлар Хитой эркинлиги учун ҳаётини фидо қилган.

Шу билан бирга, Трамп ҳазиломуз тарзда: «АҚШга қарши тил бириктирар экансиз, илтимос, менинг энг яхши тилакларимни (Россия президенти) Владимир Путин ва (КХДР раҳбари) Ким Чен Инга етказинг», – деди.

Пекиндаги ҳарбий парад сўнгги йиллардаги энг йириги бўлиб, унда дронлар, кибер ва радиоэлектрон қуроллар, шунингдек, гипертовушли ракеталар намойиш этилди.

Тантаналарда Россия, Эрон, Покистон, Монғолия, КХДР, Мьянма, Словакия, Сербия, Ўзбекистон ва Беларусь раҳбарлари ҳам иштирок этди.