Инсон ҳуқуқлари ва демократия масалалари бўйича ЕХҲТ конференцияси ўтказилмоқда

6 октябрь куни Варшавада Европада Хавфсизлик ва Ҳамкорлик Ташкилоти (ЕХҲТ)нинг инсон ҳуқуқлари, демократия ва қонун устуворлиги ҳолатини муҳокама қилишга бағишланган анъанавий Warsaw Human Dimension Conference конференцияси иш бошлади. Жорий йилда форум Хельсинки якуний акти қабул қилинганининг 50 йиллиги фонида бўлиб ўтмоқда.

Конференциянинг асосий мақсади — ЕХҲТ доирасида қабул қилинган инсон ҳуқуқлари ва асосий эркинликлар соҳасида иштирокчи давлатларнинг мажбуриятларини бажаришини баҳолашдан иборат.

Конференция мавзулари ЕХҲТ ҳудудида инсон ҳуқуқлари ва эркинликларининг асосий масалаларини қамраб олади. Муҳокама қилинаётган мавзулар орасида — демократик институтларни ривожлантириш, сайловларнинг очиқлиги, суд тизимининг мустақиллиги, сўз эркинлиги ва ОАВ фаолияти масалалари бор. Шунингдек, тенглик, камситишга қарши кураш масалаларига ҳам катта эътибор қаратилмоқда.
Кейинги 10 кун давомида иштирокчилар пленар йиғилишлар ва мавзули секцияларда мунозараларни давом эттиришлари режалаштирилган.

Ўзбекистон ташкилотга 1992 йилда аъзо бўлган ва ЕХҲТнинг тўлақонли иштирокчиси ҳисобланади.