8 млн долларлик фирибгарлик билан шуғулланган жиноий гуруҳ фош этилди

Сохта Call-марказ орқали фуқаролар алданган

Давлат хавфсизлик хизмати (ДХХ) Сирдарё вилояти бўйича бошқармаси ходимлари вилоят Ички ишлар бошқармаси билан ҳамкорликда ўтказган тезкор-қидирув тадбирлари натижасида ноқонуний GSM-шлюз қурилмаларидан фойдаланиб, сохта Call-марказ ташкил этган жиноий гуруҳ фаолиятига чек қўйди.

Маълум қилинишича, жиноий гуруҳ аъзолари фирибгарлик йўли билан қўлга киритилган пул маблағларини криптоактивлар кўринишида хорижга чиқариш ва легаллаштириш билан шуғулланган.

Гуруҳ аъзолари орасида банк ходими ҳам бўлган

Тошкент шаҳри ва Тошкент вилоятида яшовчи, 1989–2005 йилларда туғилган 5 нафар шахс Тошкент шаҳрининг Миробод туманидаги нотурар бинолардан бирини ижарага олиб, сохта Call-марказ ташкил этган.

Шунингдек, гуруҳ билан алоқадор бўлган, 1989 йилда туғилган фуқаро бошқа шахснинг турар жойини ижарага олиб, Call-марказ фаолиятида фойдаланиш мақсадида у ерга GSM-шлюз қурилмасини ўрнатган.

Тошкент вилоятида яшовчи, 1979 йилда туғилган, муқаддам судланган шахс жиноий гуруҳга раҳбарлик қилган. Гуруҳ аъзолари орасида нуфузли банклардан бирининг бош офиси киберхавфсизлик бўлими ходими ҳам бўлган.

Фуқаролар номига онлайн кредитлар расмийлаштирилган

Жиноий гуруҳ аъзолари турли банклар номидан фуқароларга қўнғироқ қилган. Улар гўёки фуқаролар номига фирибгарлар томонидан кредит олишга уриниш бўлаётганини айтиб, жабрланувчиларни алдаган.

Шу йўл билан фуқароларнинг шахсий маълумотларини қўлга киритиб, банк карталаридаги пул маблағларини ўзлаштирган ҳамда уларнинг номига онлайн кредитлар расмийлаштирган.

8 млн доллар криптовалюта орқали хорижга чиқарилган

Терговга оид маълумотларга кўра, жиноий йўл билан топилган жами 8 миллион АҚШ доллари миқдоридаги маблағлар сохта масъулияти чекланган жамият (МЧЖ) орқали криптовалюта кўринишида хорижий давлатга олиб чиқилган ва легаллаштирилган.

Мазкур ҳолат юзасидан жиноят иши қўзғатилган. Дастлабки тергов давомида жиноий фаолиятга алоқадор бўлган яна 10 нафар шахс аниқланган.

Ҳозирда иш бўйича дастлабки тергов ҳаракатлари олиб борилмоқда.

Муаллиф: Ҳасанбой ОЧУН