Ўзбекистон банкларининг активлари ҳажми 962,8 триллион сўмга етди

Марказий банкнинг таҳлилий маълумотларига кўра, 2026 йилнинг январь–апрель ойларида мамлакатда фаолият юритаётган 34 та тижорат банки жами 6,94 триллион сўм соф фойда қайд этган. Бу ҳақда UzA хабар берди.

Бу кўрсаткич ўтган йилнинг мос даврига нисбатан 2,64 триллион сўмга кўп. Таҳлилларга кўра, 2024 йилнинг дастлабки тўрт ойида банкларнинг соф фойдаси 3 триллион сўмни ташкил этган бўлса, сўнгги икки йил мобайнида мазкур кўрсаткич икки баравардан зиёд ўсган.

Банк активларида ҳам ўсиш бор

Жорий йилнинг 1 май ҳолатига кўра, мамлакат банкларининг жами активлари ҳажми 962,8 триллион сўмга етган. Бу бир йил аввалги кўрсаткичга нисбатан қарийб 133 триллион сўмлик ўсиш демакдир.  

Банк активларининг 338,5 триллион сўми ёки 35 фоизи хорижий валюта ҳиссасига тўғри келади. Қиёсий таҳлиллар шуни кўрсатадики, 2025 йил 1 май ҳолатида хорижий валютадаги активлар ҳажми 335,8 триллион сўм бўлиб, умумий активларнинг 40 фоизини ташкил этган.  

Демак, бир йил ичида валютадаги активлар улуши 5 фоиз бандга қисқариб, миллий валютадаги операциялар салмоғи ортган.  

Банкларни активлар ҳажми бўйича таҳлил қилганда, мамлакатда активлари 30 триллион сўмдан юқори бўлган 12 та банк фаолият юритмоқда. Шунингдек, 9 та банкнинг активлари 10–30 триллион сўм, 8 та банкнинг активлари 3–10 триллион сўм оралиғида бўлса, 5 та банкнинг активлари 3 триллион сўмгача етади.