Вояга етмаган қиз билан турмуш қурганлик учун жавобгарлик кучайтирилади

Лойиҳада қариндошлар ўртасида никоҳни тақиқлаш назарда тутилмоқда. Хусусан, ён шажара бўйича 2-, 3- ва 4-даражадаги қариндошлар, тоға ва амаки, амма ва хола ўз жиянлари билан, шунингдек, тоғавачча, амакивачча, аммавачча ҳамда холаваччалар ўртасида никоҳ тузишга йўл қўйилмаслиги белгиланмоқда.

Шу билан бирга, никоҳ ёшини камайтириш тартибига ҳам аниқлик киритилмоқда. Никоҳга киришни истаган шахсларнинг аризасига кўра, ҳомиладорлик ёки бола туғилиши билан боғлиқ ҳолатларда туман ёки шаҳар ҳокими никоҳ ёшини кўпи билан бир йилга камайтириши мумкин.

Қонун лойиҳасига мувофиқ, етарли ёшга тўлмаган шахс билан ҳақиқий никоҳ муносабатларига киришиш, агар ушбу қилмиш учун аввал маъмурий жавобгарлик қўлланилган бўлса, БҲМнинг 50 бараваридан 100 бараваригача, яъни 20 миллион 600 минг сўмдан 41 миллион 200 минг сўмгача жарима ёки 240 соатдан 300 соатгача мажбурий жамоат ишлари ёхуд 2 йилгача ахлоқ тузатиш ишлари билан жазоланиши белгиланмоқда.

Маълумот учун, амалдаги қонунчиликка кўра, ушбу қилмиш учун БҲМнинг 20 бараваридан 30 бараваригача, яъни 8 миллион 240 минг сўмдан 12 миллион 360 минг сўмгача жарима ёки 240 соатгача мажбурий жамоат ишлари ёхуд 1 йилгача ахлоқ тузатиш ишлари жазоси назарда тутилган.