Al-Sharaa Trampning Gʻazo rejasini "jiddiy jinoyat" deya baholadi

Bundan bir necha kun oldin Tramp AQSh urushdan vayron boʻlgan Gʻazo sektorini oʻz nazoratiga olishini va falastinliklar boshqa joyga koʻchirilgach, uni iqtisodiy jihatdan rivojlantirishini maʼlum qilgan edi. 

Al-Sharaaga koʻra, falastinliklar Trampning rejasiga binoan Gʻazoga qaytish huquqiga ega boʻlmaydi.

"Men ishonamanki, hech bir kuch xalqni oʻz yurtidan quvib chiqarolmaydi. Koʻplab davlatlar buni amalga oshirishga uringan, ammo ularning barchasi muvaffaqiyatsizlikka uchragan, ayniqsa soʻnggi bir yarim yil ichida Gʻazada boʻlib oʻtgan urushda bu yaqqol koʻrinib turibdi", deydi u.

Shuningdek, u Trampning falastinliklarni oʻz yurtidan majburan chiqarish tashabbusini na oqilona, na axloqiy va siyosiy jihatdan toʻgʻri deb hisoblashini bildirgan.

"Bu mojaroga 80 yildan oshdi va falastinliklarni siqib chiqarish boʻyicha barcha urinishlar muvaffaqiyatsizlikka uchradi. Kimki oʻz yurtini tark etgan boʻlsa, bu qaroridan afsuslangan. Har bir avlod oʻz yurtiga egalik qilish naqadar muhimligini anglab yetmoqda", deya qoʻshimcha qilgan u.

Bundan tashqari, Misr, Iordaniya va boshqa arab davlatlari falastinliklarning chegarani kesib oʻtishiga keskin qarshi chiqmoqda. 

Ularga koʻra, har qanday ommaviy koʻchirilish ikki davlatli yechim, yaʼni Isroil yonida Falastin davlati barpo etilishi istiqbollarini yanada zaiflashtiradi va arab davlatlarini ogʻir oqibatlar bilan yuzlashtiradi.