BMT Gʻazodagi insonparvarlik yordami hajmini oshirishga umid qilmoqda

Bu haqda BMT Bosh kotibi matbuot kotibi Stefan Dyujarrik tashkilotning kundalik brifingida maʼlum qildi.

Uning soʻzlariga koʻra, BMT “yordam hajmini oshirish imkonini beruvchi tizim shakllantirilishini intizorlik bilan kutmoqda”, bu esa koʻproq chegara oʻtish punktlari (KPP) orqali yordam yuklarini yetkazishga sharoit yaratadi.

Dyujarrik maʼlumot berishicha, ayni paytda BMT va Isroil tomonlari oʻrtasida mazkur masala boʻyicha faol muzokaralar olib borilmoqda.

“Biz insonparvarlik yordamini yetkazib berish jarayonida tez faollik va aniq ijobiy siljishlarni kutmoqdamiz”, — dedi Dyujarrik.

Amerika OAV maʼlumotlariga koʻra, Isroil HAMAS tomonidan barcha halok boʻlgan garovdagi shaxslar jasadlarini qaytarib bermayotgani sababli, Gʻazoga yoʻnaltiriladigan yordam hajmini qisqartirish toʻgʻrisida BMTni xabardor qilgan.

Maʼlumotlarga koʻra, Isroil hozircha faqat 300 ta yuk mashinasiga kirish ruxsatini bermoqda — bu kelishilgan miqdorning yarmiga teng.