Gʻazodagi urushda 500 dan ortiq Markaziy Osiyo fuqarolari ishtirok etgan

Bu haqda «Al-Jazira» xabar berdi.

Qayd etilishicha, jang harakatlari ishtirokchilarining aksariyati AQSh yoki Yevropa davlatlari pasportlariga ega. Manba maʼlumotlariga koʻra, 2023 yil 7 oktabrdan beri Gʻazoda kamida 72 061 kishi halok boʻlgan.

Dunyo boʻylab huquqni himoya qilish tashkilotlari Gʻazodagi ehtimoliy harbiy jinoyatlarga aloqador boʻlishi mumkin boʻlgan xorijliklarni aniqlash va javobgarlikka tortish masalasini koʻtarmoqda. Ayrim harbiylar ijtimoiy tarmoqlarda oʻz harakatlarini namoyish etuvchi videolarni eʼlon qilgan.

Maʼlumotlarga koʻra, Isroil armiyasida kamida 12 135 nafar AQSh fuqarosi xizmat qiladi — bu eng yuqori koʻrsatkich. Shuningdek, 1 207 nafar harbiy xizmatchi AQSh, Isroil va yana bir davlat fuqaroligiga ega.

Keyingi oʻrinlarda Fransiya — 6 127 nafar, Rossiya — 5 067 nafar, Germaniya — 3 901 nafar, Ukraina — 3 210 nafar, Buyuk Britaniya — 1 686 nafar va Ruminiya — 1 675 nafar fuqaro qayd etilgan.

Isroil armiyasida xizmat qilayotgan fuqarolar soni boʻyicha Oʻzbekiston 126 davlat orasida 27-oʻrinni egallaydi. 264 kishi qoʻshaloq fuqarolikka (Oʻzbekiston va Isroil), yana 5 kishi bir nechta fuqarolikka ega.

Markaziy Osiyo davlatlari kesimida koʻrsatkichlar quyidagicha:
— Qozogʻiston — 189 nafar (qoʻshaloq fuqarolik), 3 nafar (koʻp fuqarolik);
— Qirgʻiziston — 52 nafar (qoʻshaloq fuqarolik), 3 nafar (koʻp fuqarolik);
— Turkmaniston — 31 nafar (qoʻshaloq fuqarolik), 2 nafar (koʻp fuqarolik);
— Tojikiston — 8 nafar (qoʻshaloq fuqarolik).

Taʼkidlash joizki, Markaziy Osiyo davlatlarining barchasi qonunchiligida xorijiy qurolli kuchlarda xizmat qilish va yollanma askarlik uchun jinoiy javobgarlik belgilangan.