Britaniya parlameti aʼzolari Falastinni tan olish kerakligini talab qilmoqda

Mehnat va Liberal-demokratlar partiyalari deputatlari tayyorlagan hisobotda Falastin xalqi oʻz davlatiga egalik qilishi "muhokama qilinmaydigan huquq ekani, bu ish hech qanday shartga bogʻliq boʻlmasligi kerak"ligi taʼkidlangan.

Ikki konservativ deputat — Afra Brandret va ser Jon Uittingdeyl taklifga qoʻshilmadi. Ular Falastin davlati tan olinishi Yaqin Sharq mojarosining uzoq muddatli siyosiy yechimi doirasida amalga oshirilishi kerakligi, bu amaldagi hukumat pozitsiyasiga ham mos kelishiga eʼtibor qaratgan.

Bosh vazir Kir Starmer avvalroq Falastin davlatini tan olish "eng kuchli taʼsir koʻrsatadigan payt" amalga oshirilishini aytgandi. Hozirgi hujjatda ayni yondashuv tanqid qilinib, "hukumat mukammal fursatni kutishi nooʻrinligi, chunki bunday kun hech qachon kelmasligi ham mumkin"ligiga urgʻu berilgan.

Soʻnggi haftalarda 60 dan ortiq deputat va London meri Sodiq Xon ham chaqiriqni qoʻllab-quvvatlagan.

Eslatib oʻtamiz, avvalroq Fransiya prezidenti Emmanuel Makron sentabr oyida Nyu-Yorkda boʻlib oʻtadigan BMT Bosh assambleyasi sessiyasida Falastin davlatini rasman tan olganini eʼlon qilishi haqida xabar bergan edik.