Buxoroda havoni ifloslantirgan 117 amaldor jazoga tortildi

Qayd etilishicha, Buxoro viloyati Ekologiya, atrof-muhitni muhofaza qilish va iqlim oʻzgarishi boshqarmasi tomonidan atmosfera havosini muhofaza qilish talablarining buzilishiga qarshi doimiy nazorat reyd tadbirlari oʻtkazib kelinmoqda. Reyd davomida oʻtgan 9 oy ichida jami 1356 nafar fuqaro tomonidan huquqbuzarlik sodir etilgani maʼlum boʻlgan. 

Xususan, huquqbuzarlarning 117 nafari mansabdor shaxslar ekanligi aniqlangan. Ular qurilish chiqindilari va boshqa chiqindi turlarini yoqish, shuningdek, dala va aholi punktlarida xazon, shox-shabbalarga oʻt qoʻyish kabi huquqbuzarliklarni sodir etgan. 

Holat yuzasidan fuqarolarga nisbatan Oʻzbekiston Respublikasi Maʼmuriy javobgarlik toʻgʻrisidagi kodeksining 88-moddasiga muvofiq bayonnoma rasmiylashtirildi. Huquqbuzarlar jami 332 million soʻm miqdorida jarimaga tortilgan.