«Ekostiker» tizimi: 2026 yildan jarimalar qoʻllanilmaydi

Rasmiy manbalar bu maʼlumotlarni inkor etdi.

Maʼlum qilinishicha, «Ekologik transport» tizimi doirasida jarimalar 2026 yildan emas, balki 2028 yildan boshlab joriy etiladi. 2026–2027 yillar esa tizimni bosqichma-bosqich yoʻlga qoʻyish, haydovchilarni xabardor qilish va ekologik madaniyatni shakllantirish davri hisoblanadi.

Tizimning asosiy maqsadi

Mutaxassislar taʼkidlashicha, avtomobil va yuk mashinalaridan chiqadigan zararli gazlar iqlim oʻzgarishi, havo haroratining oshishi hamda kislota yomgʻirlariga sabab boʻlmoqda. «Ekostiker» tizimining asosiy maqsadi jarima qoʻllash emas, balki aholi oʻrtasida ekologik toza transportdan foydalanish madaniyatini keng targʻib qilish va shahar havosining sifatini yaxshilashdan iborat.

Haydovchilar uchun yaratilgan imkoniyatlar

Tizim haydovchilarga qulaylik yaratish tamoyili asosida ishlaydi. Xususan:

• Stiker rangini oʻzgartirish imkoniyati — agar avtomobil sariq yoki qizil stiker olgan boʻlsa, texnik sozlash orqali uni «yashil» toifaga oʻtkazish mumkin;
• Diagnostika markazlari — respublika boʻylab zamonaviy texnik koʻrik markazlari faoliyat yuritmoqda;
• Elektron ogohlantirish tizimi — yoʻl harakati xavfsizligining yagona elektron tizimi va kameralar orqali haydovchilarga qaysi hududga kirish mumkin yoki mumkin emasligi haqida oldindan maʼlumot beriladi.

Rasmiylarga koʻra, 2026 yilda hech kim jarimaga tortilmaydi. Bu davr mobaynida har bir haydovchi oʻz avtomobilning texnik holatini yaxshilash imkoniyatiga ega boʻladi.

Avtomobillarni oʻz vaqtida texnik koʻrikdan oʻtkazish va sifatli yoqilgʻidan foydalanish nafaqat tabiatni asrash, balki yoʻl harakati xavfsizligini taʼminlashda ham muhim. Ekologik toza transport — kelajak avlod oldidagi masʼuliyatdir.