Endi Yevropaga borish yanada osonlashadi

Oʻzbekiston va Yevropa Ittifoqi oʻrtasida vizalarni soddalashtirish boʻyicha muzokaralar boshlandi. Tashqi ishlar vazirligi Yevropa Komissiyasining Ichki ishlar va migratsiya boʻyicha bosh boshqarmasi vakillari bilan ilk bosqich uchrashuvini oʻtkazdi.

Uchrashuvda Oʻzbekiston fuqarolarining Yevropa Ittifoqiga ishlash, oʻqish, xalqaro yuk tashuvchi haydovchi sifatida borishi, shuningdek, turistik guruhlar uchun vizalarni olish tartibini yengillashtirish masalalari muhokama qilindi. Qayd etilishicha, ushbu oʻzgarishlar fuqarolar uchun vaqt va moliyaviy xarajatlarni qisqartirishi mumkin.

Yevropa tomoni vizalarni soddalashtirish boʻyicha kelishuvlarni kun tartibiga kiritish uchun bajarilishi lozim boʻlgan ayrim shartlar yuzasidan maʼlumot berdi. Uchrashuv yakunida tomonlar belgilangan maqsadlarga erishish uchun kelgusida ham oʻzaro maslahatlashuvlarni davom ettirishga kelishib oldi.