Erdoʻgʻan: “Falastin davlatini tan olishga qaratilgan har qanday qadamni qoʻllab-quvvatlaymiz”

Oʻz nutqida prezident dolzarb mavzu – Gʻazodagi vaziyat va mintaqadagi rivojlanish haqida fikr bildirdi.

«Bizning ustuvor vazifamiz – Gʻazodagi birodarlarimizga insonparvarlik yordamini yetkazish. Insoniyat vakili sifatida biz bu zulmni toʻxtatish uchun barcha imkoniyatlardan foydalanishimiz kerak. Soʻnggi kunlarda Yevropa, xususan Fransiya va Buyuk Britaniya tomonidan koʻrsatilgan insonparvar munosabatni yuksak baholaymiz», dedi Turkiya rahbari.

Erdoʻgʻon va Ngema Gʻazodagi genotsid haqida ham gaplashdilar.

«Afrika qitʼasi – Falastin xalqiga eng qattiq va kuchli tilda hamdardlik bildirgan mintaqalardan biri. 22 oydan beri davom etayotgan Isroil zoʻravonligi tufayli oʻlib ketayotgan goʻdaklar, yegulik olish uchun yigʻilgan tinch fuqarolarga qarata oʻt ochilishi kabi manzaralar kishini larzaga soladi. Bu kabi vahshiylikka vijdoni, shafqat va insoniylik hissi bor odam sabr qilib qarashi mumkin emas», dedi Erdoʻgʻan.

«Biz Falastin davlatini tan olishga qaratilgan har bir qadamni mamnuniyat bilan qabul qilamiz. Isroilning genotsid siyosatiga eng samarali javob – 1967 yil chegaralariga asoslangan ikki davlatli yechimni qoʻllab-quvvatlash hisoblanadi. Yaqinda Fransiya prezidenti Makron bilan telefonda gaplashdim va uning jasur qarorini olqishladim. Prezident Ngema ham Gʻazoda insonparvar inqirozni oldini olish borasida biz bilan bir fikrda. Yaqin kunlarda Isroil hukumatiga bosimni kuchaytirish, Gʻazodagi birodarlarimiz oʻzlarini yakkalangandek his qilmasligi uchun bor kuchimizni ishga solamiz. Tinchlik oʻrnatish uchun yanada faol harakat qilamiz».

Erdoʻgʻan soʻzlarini shunday yakunladi:

«Bizning maqsadimiz – Gʻazodagi birodarlarimizning dardiga shifo berish, ularga yordam qoʻlini choʻzish, uysiz va kiyimsiz qolgan goʻdaklarga yordam berishdir. Umid qilamanki, mamlakatimizdagi barcha siyosatchilar bu masalaga jiddiy, hurmat bilan yondashib, Turkiyaning butun dunyoda eʼtirof etilgan saʼy-harakatlariga salbiy taʼsir koʻrsatishi mumkin boʻlgan bayonotlardan tiyiladilar».