Эрдўған: “Фаластин давлатини тан олишга қаратилган ҳар қандай қадамни қўллаб-қувватлаймиз”

Ўз нутқида президент долзарб мавзу – Ғазодаги вазият ва минтақадаги ривожланиш ҳақида фикр билдирди.

«Бизнинг устувор вазифамиз – Ғазодаги биродарларимизга инсонпарварлик ёрдамини етказиш. Инсоният вакили сифатида биз бу зулмни тўхтатиш учун барча имкониятлардан фойдаланишимиз керак. Сўнгги кунларда Европа, хусусан Франция ва Буюк Британия томонидан кўрсатилган инсонпарвар муносабатни юксак баҳолаймиз», деди Туркия раҳбари.

Эрдўғон ва Нгема Ғазодаги геноцид ҳақида ҳам гаплашдилар.

«Африка қитъаси – Фаластин халқига энг қаттиқ ва кучли тилда ҳамдардлик билдирган минтақалардан бири. 22 ойдан бери давом этаётган Исроил зўравонлиги туфайли ўлиб кетаётган гўдаклар, егулик олиш учун йиғилган тинч фуқароларга қарата ўт очилиши каби манзаралар кишини ларзага солади. Бу каби ваҳшийликка виждони, шафқат ва инсонийлик ҳисси бор одам сабр қилиб қараши мумкин эмас», деди Эрдўған.

«Биз Фаластин давлатини тан олишга қаратилган ҳар бир қадамни мамнуният билан қабул қиламиз. Исроилнинг геноцид сиёсатига энг самарали жавоб – 1967 йил чегараларига асосланган икки давлатли ечимни қўллаб-қувватлаш ҳисобланади. Яқинда Франция президенти Макрон билан телефонда гаплашдим ва унинг жасур қарорини олқишладим. Президент Нгема ҳам Ғазода инсонпарвар инқирозни олдини олиш борасида биз билан бир фикрда. Яқин кунларда Исроил ҳукуматига босимни кучайтириш, Ғазодаги биродарларимиз ўзларини яккалангандек ҳис қилмаслиги учун бор кучимизни ишга соламиз. Тинчлик ўрнатиш учун янада фаол ҳаракат қиламиз».

Эрдўған сўзларини шундай якунлади:

«Бизнинг мақсадимиз – Ғазодаги биродарларимизнинг дардига шифо бериш, уларга ёрдам қўлини чўзиш, уйсиз ва кийимсиз қолган гўдакларга ёрдам беришдир. Умид қиламанки, мамлакатимиздаги барча сиёсатчилар бу масалага жиддий, ҳурмат билан ёндашиб, Туркиянинг бутун дунёда эътироф этилган саъй-ҳаракатларига салбий таъсир кўрсатиши мумкин бўлган баёнотлардан тийиладилар».