Apple iPad va MacBook narxlarini keskin oshirdi

Apple 26-iyun kuni iPad va MacBook narxlarini oshirdi. Bunga sun’iy intellekt (SI) sanoatida ma’lumotlar markazlarining jadal kengayishi tufayli xotira va ma’lumotlarni saqlash chiplari narxining keskin oshib ketgani asosiy sabab sifatida ko‘rsatilmoqda.

Kompaniya mijozlarini bu o‘zgarishlardan ortiq himoya qila olmasligini ma’lum qildi.

Ushbu qadam Apple’ning asosiy daromad manbayi bo‘lgan iPhone’ga ta’sir qilmaydi. Ammo arzon Windows va Chromebook noutbuklaridan bozor ulushini tortib olishga qaratilgan kompaniyaning eng hamyonbop noutbuki – Neo’ning boshlang‘ich narxi 599 dollardan 699 dollarga ko‘tariladi.

Yangilangan Narxlar

Apple o‘z veb-saytida e’lon qilgan yangilangan ro‘yxatga ko‘ra, narxlardagi asosiy o‘zgarishlar quyidagicha:

Shuningdek, Apple HomePod aqlli karnayining ikkala versiyasi hamda Apple TV qurilmalari narxini ham oshirdi.

Xabarlar ortidan kompaniya aksiyalari deyarli 5% ga, uning asosiy raqobatchisi bo‘lgan Dell aksiyalari esa 8% dan ko‘proqqa pasaydi.

Sanoatdagi inqiroz

Micron kabi xotira ishlab chiqaruvchilari so‘nggi oylarda Nvidia va boshqa SI chiplarini ishlab chiqaruvchilarning buyurtmalariga ko‘proq ahamiyat berishni boshlagan.

Bu xotira qurilmalari zavodlariga rekord darajada foyda keltirmoqda, biroq elektronika ishlab chiqaruvchilari uchun kam zaxira qolmoqda. Oqibatda ularda narxlarni oshirishdan boshqa chora yo‘q.

"Biz hech qachon butlovchi qismlar narxining bunday tez oshganini ko‘rmaganmiz," – deyiladi Apple rasmiy bayonotida. "Shu paytgacha mijozlarimizni bu o‘sishlardan himoya qilib keldik, ammo endi iPad va Mac kabi qator mahsulotlarimiz narxlarini oshirishni boshlashimiz kerak."

Xarajatlarning o‘sishi qurilmalar bozoriga juda og‘ir ta’sir qiladi. Natijada joriy yilda tarixdagi eng katta pasayish kuzatilib, smartfonlar bozori salkam 14 foizga, kompyuterlar bozori esa 11,3 foizga qisqarishi mumkin.

Kutilayotgan oqibatlar:

Tahlilchilar kuzatuviga qaraganda, tez orada iPhone narxlari ham oshadi.

MacBook Neo hamyonbopligini yo‘qotmoqda. Mart oyida sotuvga chiqarilgan va Apple savdolarini qutqarib qolgan $599 lik MacBook Neo endilikda qimmatlashgani hisobiga Dell o‘tgan oy taqdim etgan $699 lik XPS 13 modeliga nisbatan narx ustunligini yo‘qotdi.

Qolaversa, u Lenovo va Asus kabi ishlab chiqaruvchilarning ba’zi Chromebook modellaridan ham qimmatroq qurilmaga aylandi.