Telefoningiz bosh barmog‘ingizni ishdan chiqaryapti — tadqiqot

Soatlab ijtimoiy tarmoqda o‘tirish, seriallarni to‘liq tomosha qilish — smartfonlar kundalik odatimizga aylanib ulgurdi. Biroq bular qo‘llarimizga salbiy ta’sirini ko‘rsatmay qolmaydi.

“Qo‘llarimiz kun bo‘yi telefondan foydalanish uchun yaratilmagan. Telefondan foydalanishda qo‘llarimizga e’tiborli bo‘lishimiz kerak”, — deydi Sedars-Sinay Ortopediya va sport tibbiyoti markazi jarrohi Yevgeniy Say.

Hozirgi smartfonlar avvalgilariga qaraganda kattaroq va og‘irroq bo‘lib, ulardan foydalanish odatlarimiz ham o‘zgargan.

Bilak va tirsaklarni soatlab bir xil holatda ushlab turish bosh barmoq va bilakda og‘riq paydo qiladi. Telefonni uzoq vaqt tik ushlab turish boshqa barmoqlarni ham zo‘riqtiradi.

Qanday tavsiyalar bor?

Eng oddiy yechim – ekran vaqtini cheklash yoki telefondan foydalanishda ora-orada qisqa tanaffuslar qilib turish.

Agar siz uchun bu imkonsiz bo‘lsa, qo‘llaringizdan navbatma-navbat foydalaning, bosh barmoq o‘rniga ko‘rsatkich barmoqni ham ishlating. Qurilmani ushlash holatingizni tez-tez o‘zgartiring.

Smartfondagi maxsus imkoniyatlar ham ancha samarali. Masalan, shrift hajmini kattalashtirish telefonni yuzga yaqin ushlab turish zaruratini yo‘qotadi.

Halqa va doira shaklidagi tutqichlar telefon og‘irligini kaftga bir tekis taqsimlab, video tomosha qilish uchun tayanch vazifasini ham bajarishi mumkin.

Har kuni bajariladigan oddiy qo‘l mashqlari esa uzoq vaqt telefon ishlatgandan keyingi og‘riqlarni kamaytiradi.

Telefondan doimiy foydalanish bosh barmoqdagi mavjud artritni kuchaytirishi, De Kerven tenosinovitini keltirib chiqarishi yoki “trigger thumb” nomli sindromga sabab bo‘lishi mumkin.