Gʻazoni tiklash uchun oʻnlab milliard dollar talab etiladi

«Gʻazoni tiklashni moliyalashtirish» mavzusidagi anjumanda xalqaro investorlar, arab davlatlari va falastinlik xususiy sektor vakillari ishtirok etdi. Ular iqtisodiy tiklanish jarayonida xususiy sektor ishtirokini kengaytirish va xalqaro moliyaviy yordamni jalb qilish zarurligini qayd etdilar.

Anjuman yakunidagi bayonotda Gʻazodagi otashkesimning boshlanishi, isroillik asirlarni ozod etish va falastinliklarni oilalari bilan birlashtirish yuzasidan qoʻlga kiritilgan natijalar olqishlandi. Shuningdek, AQSh rahbarligi va vositachilik faoliyati uchun minnatdorlik bildirildi.

Hujjatda taʼkidlanishicha, barqaror tinchlikka erishish uchun faqat siyosiy saʼy-harakatlar emas, balki iqtisodiy tiklanish va Gʻazoni qayta qurish ishlari ham muhim ahamiyatga ega.

Konferensiyada arab davlatlari tomonidan ilgari taklif etilgan Gʻazoni barvaqt tiklash va rivojlantirish boʻyicha arab-islom rejasi asosidagi dasturlar ham muhokama qilindi.

Taʼkidlanishicha, bu jarayon moliyaviy resurslar bilan birga xususiy sektorning faol ishtirokini va mutaxassislik salohiyatini talab etadi. Anjuman yakunida, xususiy sarmoyalar hisobiga barqaror tiklanish yoʻllarini belgilash boʻyicha muayyan ilgarilashga erishilgani qayd etildi.

Eslatib oʻtamiz, 9 oktabr kuni AQSh prezidenti Donald Trampning bayonotiga koʻra, Isroil va HAMAS oʻrtasidagi otashkesim rejasi ilk bosqichda maqullangan, hamda 10 oktabrdan kuchga kirgan. Sharm ash-Shayx shahrida boʻlib oʻtgan tinchlik sammitida Misr, Turkiya, AQSh va boshqa davlatlar rahbarlari ishtirok etgan.