Oʻzbekistonda uy-joy va avtomobil xaridi 1 apreldan naqd pulsiz tartibga oʻtadi

2026 yil 1 apreldan boshlab Oʻzbekistonda qator yirik toʻlovlar faqat bank kartalari yoki elektron toʻlov tizimlari orqali amalga oshiriladi. Bu Prezidentning 10 dekabrda qabul qilingan “Naqdsiz hisob-kitoblarni ommalashtirish va yashirin iqtisodiyot ulushini qisqartirishga qaratilgan qoʻshimcha chora-tadbirlar toʻgʻrisida”gi farmonida belgilandi, deb xabar berdi Adliya vazirligi.

Farmonga muvofiq, naqd pulsiz hisob-kitob majburiy tartibda qoʻllaniladigan operatsiyalar quyidagilar:

• davlat organlari tomonidan koʻrsatiladigan xizmatlar;
• elektr energiyasi, tabiiy gaz va ichimlik suvi uchun toʻlovlar;
• alkogol va tamaki mahsulotlari xaridi;
• yoqilgʻi quyish shoxobchalarida neft-gaz mahsulotlari sotib olish hamda elektromobillarni zaryadlash xizmatlari;
• qiymati 25 mln soʻmdan yuqori boʻlgan tovar va xizmatlar;
• koʻchmas mulk obʼektlari hamda ishlab chiqarilganiga 10 yildan oshmagan M, N, O va G toifadagi transport vositalarini sotish va sotib olish.

Farmonda 2030 yilgacha quyidagi maqsadlar belgilangan:

• kuzatilmaydigan iqtisodiyot ulushini YaIMga nisbatan 1,3 baravarga qisqartirish;
• savdo va xizmat koʻrsatish sohalarida naqdsiz toʻlovlar ulushini 75 foizga yetkazish.

Bundan avval, Soliq qoʻmitasi raisining birinchi oʻrinbosari Mubin Mirzayev koʻchmas mulk va avtotransport vositalarini sotishda faqat naqd pulsiz hisob-kitobdan foydalanish taklif etilayotganini maʼlum qilgan, ushbu operatsiyalarda komissiya bekor qilinishi moʻljallanayotganini aytgandi.

Yangi tartibga koʻra:

• jismoniy shaxslar bilan oldi-sotdi shartnomalari bank maʼlumotlari asosida notarial rasmiylashtiriladi;
• yuridik shaxslarda esa naqd pulsiz toʻlovni tasdiqlovchi hujjat mavjud boʻlgan taqdirda elektron hisobvaraq-faktura orqali tasdiqlanadi;
• qiymati 3000 dollardan yuqori boʻlgan tovar va xizmatlar uchun ham toʻlov faqat naqd pulsiz shaklda amalga oshirilishi taklif etilmoqda.

Yangi tartib 2026 yil 1 apreldan kuchga kiradi.