Oʻzbekistonda «yashil» energiya hajmi 9 milliard kVt·soatga yetdi

Taʼkidlanishicha, bu koʻrsatkich prezident tomonidan 2023 yil 20 sentabrda BMT Bosh Assambleyasining 78-sessiyasida hamda 2025 yil 23 sentabr kuni Nyu-York shahridagi BMT Bosh Assambleyasining 80-yubiley sessiyasida belgilab berilgan strategik vazifalar — iqtisodiyotni iqlim oʻzgarishlariga moslashtirish, uglerod neytralligiga erishish va «yashil» energetika ulushini oshirish yoʻlidagi amaliy natijalardan biri hisoblanadi.

Hozirda mamlakat boʻylab umumiy quvvati 4 682 megavatt boʻlgan 12 ta quyosh fotoelektr stansiyasi va 5 ta shamol elektr stansiyasi faoliyat yuritmoqda.

«Yashil» energiya hisobiga:

• 2 mlrd 730 mln kub metr tabiiy gaz tejaldi;
• atmosferaga chiqishi mumkin boʻlgan 4 mln tonna zararli moddalarning oldi olindi.

Shuningdek, joriy yil boshidan 22 oktabr soati 19:00 holatigacha Oʻzbekistondagi barcha gidroelektr, quyosh va shamol stansiyalari jami 14 mlrd 520 mln kVt·soat elektr energiyasi ishlab chiqardi. Bu umumiy generatsiyaning 23 foizi «yashil energiya» hissasiga toʻgʻri kelishini anglatadi.

Boshqacha aytganda, bu miqdor 7,5 million xonadonning 10 oylik yoki 6 million xonadonning bir yillik elektr ehtiyojiga tengdir.

Maʼlumot uchun, 23 sentabr soati 14:00 holatiga koʻra, quyosh va shamol elektr stansiyalari ishlab chiqargan energiya hajmi 8 milliard kVt·soatni tashkil etgan edi.