Tramp sanksiyalari sabab “Rosneft” va “Lukoyl” 5,2 mlrd dollarga arzonladi

Rossiyaning ikki yirik neft kompaniyasi — “Rosneft” va “Lukoyl” aksiyalari AQSh sanksiyalaridan keyin keskin pasaydi. Ikki kun ichida ularning umumiy kapitalizatsiyasi 424 milliard rublga (5,2 milliard dollarga) kamaydi.

“Rosneft”ning qimmatli qogʻozlari hozirda 389,85 rubldan sotilmoqda — bu sanksiyalardan oldingi qiymatidan 3 foizga arzon. 24-oktabrda esa 383,15 rublga tushdi — bu 2023 yil mayidan buyongi eng past koʻrsatkich. Kompaniyaning bozor qiymati 127 milliard rublga (1,56 milliard dollar) yoʻqoldi.

“Lukoyl” aksiyalari esa ikki kun ichida 7,2 foizga arzonlashdi va kapitalizatsiyasi 3,66 milliard dollarga pasaydi. Kompaniya asosiy egasi Vagit Alekperovning boyligi ham ikki kunda 83 milliard rublga (1 milliard dollardan ortiq) kamaydi.

AQSh sanksiyalari

AQSh prezidenti Donald Tramp Oq uyga qaytgandan beri birinchi marta “Rosneft” va “Lukoyl” hamda ularning 36 ta shoʻʼba korxonasiga qarshi sanksiyalar joriy qildi. Bu qaror “Lukoyl”ning Dubaydagi savdo boʻlinmasini toʻxtatishi va “Rosneft”ning Hindistonga yetkazib berishlarida muammo keltirib chiqarishi mumkin.

Tramp 22-oktabr kuni eʼlon qilgan sanksiyalar Rossiya prezidenti Vladimir Putin bilan munosabatlardagi keskinlik fonida qabul qilindi. Keyinchalik Hindiston Rossiya nefti importlarini qisqartira boshladi.

Maʼlumotlarga koʻra, Hindistonning yirik davlat kompaniyalari — Indian Oil Corp, Bharat Petroleum, Hindustan Petroleum va Mangalore Refinery and Petrochemicals Rossiya nefti hujjatlarini yanada qattiq tekshirmoqda.

Eslatib oʻtamiz, Rossiya 2022 yilda Ukrainaga bostirib kirgach, Hindiston Moskva neftining eng yirik xaridoriga aylangandi. 2025 yilning dastlabki toʻqqiz oyida Hindiston oʻrtacha kuniga 1,7 million barrel Rossiya neftini import qilgan.