Turkiyada ogʻir ahvolga tushib qolgan 13 yoshli oʻzbekistonlik bola vatanga olib kelindi

Maʼlumotlarga koʻra, voyaga yetmagan bola Turkiyada ogʻir hayotiy vaziyatga duch kelib, Oʻzbekistonning Istanbuldagi Bosh konsulxonasiga yordam soʻrab murojaat qilgan.

Tashqi ishlar vazirligi hamda prezident huzuridagi Ijtimoiy himoya milliy agentligining tezkor hamkorligi natijasida bola mamlakatga qaytarildi.

Fargʻona xalqaro aeroportida uni Qoʻqon shahri “Inson” ijtimoiy xizmatlar markazi xodimlari kutib oldi. Hozirda bolani buvisi qaramogʻiga topshirish va uning ijtimoiy hamda psixologik qoʻllab-quvvatlanishini taʼminlash ishlari amalga oshirilmoqda.

Maʼlumot uchun, yaqin kunlarda Turkiyaga xizmat safari uyushtirilib, ota-ona qaramogʻisiz qolgan 30 dan ortiq bolani vatanga qaytarish ishlari rejalashtirilgan.