Buyuk Britaniya 16 yoshdan oshmaganlarga ijtimoiy tarmoqlarni taqiqlamoqda

Buyuk Britaniya Bosh vaziri Kir Starmer 16 yoshgacha bo‘lganlar uchun ijtimoiy tarmoqlarni taqiqlab, o‘yin va jonli efir platformalariga cheklovlar joriy etishini ma’lum qildi.

Starmerning so‘zlariga ko‘ra, keng qamrovli o‘zgarishlar “bolalarga bolaligini qaytarib beradi”. U Snapchat, TikTok va Instagram kabi platformalar hamda notanishlarning bolalar bilan muloqot qilishiga imkon beruvchi o‘yin saytlariga qarshi ko‘riladigan choralarni sanab o‘tdi.

“To‘liq taqiq to‘g‘ri tanlov ekanligi  kundek ravshan”, – dedi u matbuot anjumanida. "Bu juda katta o‘zgarish yasaydi, farzandlarimizni xavfsizroq, baxtliroq qiladi, ularga talaygina vaqt, xavfsizlik, ulg‘ayish uchun ko‘proq erkinlik va imkoniyatlar beradi”.

Hukumatning ma’lum qilishicha, Britaniya o‘tgan yil dekabrda taqiq joriy etgan Avstraliya modeliga o‘xshash usulni qo‘llaydi.

Ushbu taqiq YouTube, Facebook va X kabi platformalarni qamrab oladi, biroq WhatsApp va Signal singari xabar almashish xizmatlariga tatbiq etilmaydi.

Shuningdek, Britaniya 16 yoshgacha bo‘lgan bolalar uchun jonli efir va notanishlar bilan muloqot qilish kabi zararli funksiyalarga eng ilg‘or cheklovlarni joriy qiladi.

“Hech zamonda farzandingizni o‘zingiz mutlaqo tanimaydigan notanish odam bilan birga qoldirasizmi? Albatta yo‘q. Shuning uchun ham biz bu borada chora ko‘ryapmiz”, - dedi Starmer.

Uning so‘zlariga ko‘ra, hukumat har qanday taqiq bo‘yicha dastlabki qadamlarni qo‘yish vakolatiga ega.

Yil oxirigacha tegishli qoidalar ishlab chiqiladi va kelasi bahorga borib taqiq to‘liq kuchga kiradi.