Endi Tramp prezidentlik mavqeyidan ham “soqqa” qilishi mumkin

AQSH prezidenti Donald Trampga tegishli ijtimoiy tarmoq kompaniyasi uning postlarini boshqalardan oldin ko‘rish imkoniyati uchun oyiga 100 ming dollar to‘lov joriy etishni ko‘rib chiqmoqda.

Biroq yangi mexanizm jiddiy bahslarga sabab bo‘ldi. Tanqidchilar buning hukumat faoliyati ochiqligiga to‘sqinlik qilishini va Trampga prezidentlik lavozimidan yaxshigina daromad olish imkoniyati berishini ta’kidlashmoqda.

17-iyul kuni Reuters axborot agentligi Truth Social veb-saytiga egalik qiluvchi Trump Media and Technology Group kompaniyasi moliyaviy treyderlar va firmalardan Trampning postlariga birinchi kirish huquqi uchun yuqori haq olishni muhokama qilganini ma’lum qildi.

Xabarga ko‘ra, uch yillik shartnoma tuzadigan kompaniyalar uchun oyiga 60 ming dollarlik arzonroq tarif ham ko‘rib chiqilgan.

Demokratiyaga tahdid

Truth Social taklifi e’lon qilingan zahoti tanqidlarga uchradi. Tramp uzoq yillardan buyon hukumatdagi mavqeyidan shaxsiy manfaati yo‘lida foydalanishda ayblanadi. 

Mutaxassislar fikricha,  bunday pullik xizmat etika nuqtayi nazaridan AQSH demokratiyasi faoliyatiga xavf tug‘diradi.

Trampning bu harakati prezident sifatida qilayotgan ishlariga oid ma’lumotlarni sotish, deb baholandi.

Tramp nega Truth Social'ga o‘tgan?

Tramp prezidentlik davrida ijtimoiy tarmoqlardan faol foydalangan. Birinchi prezidentlik muddatida u Twitter (hozirgi X) platformasining eng faol foydalanuvchisi edi.

Ammo Trampning 2020-yilgi prezidentlik saylovlari yuzasidan asossiz da’volari hamda 2021-yil 6-yanvardagi AQSH Kongressi binosiga uyushtirilgan hujumdan so‘ng bir nechta platforma uning akkauntlarini bloklagan.

Shundan keyin Tramp o‘z media kompaniyasiga sarmoya kiritdi. Hozir u "Trump Media and Technology Group" kompaniyasining nazorat paketiga egalik qiladi.

Truth Social kompaniyaning asosiy mahsulotlaridan biri hisoblanadi. Tramp 2021-yilda Twitter’ni tark etganidan buyon deyarli faqat shu platformadan foydalanib kelmoqda.

U Eron bo‘yicha harbiy zarbalardan tortib savdo siyosatidagi o‘zgarishlargacha bo‘lgan muhim qarorlarni aynan Truth Social orqali e’lon qiladi.