AQSh butun Eronni yo‘q qilishga tayyor – Tramp

Donald Trampning aytishicha, AQSh va Eron bu hafta keskinlashgan harbiy vaziyatga qaramay muzokaralarni davom ettirishga kelishib olgan. Biroq u o‘tgan oy erishilgan o‘t ochishni to‘xtatish kelishuvi endi amalda emasligini ta’kidladi.

Shuningdek, juma kuni AQSh Erondan Hormuz bo‘g‘ozida kemalarga hujum qilishdan tiyilishni qat’iy talab qildi. So‘nggi to‘qnashuvlar tufayli neft narxi oshib ketdi, bu esa Trampga noyabr oyidagi Kongress saylovlari arafasida salbiy ta’sir qiladi.

Tramp: “AQSh butun Eronni yo‘q qilishga tayyor”

Mintaqadagi vositachilar 28-fevral kuni AQSh va Isroilning Eronga bergan zarbalari bilan boshlangan urushni butunlay yakunlash uchun qo‘ldan kelgancha harakat qilmoqda.

Tramp Truth Social ijtimoiy tarmog‘ida shunday yozdi:

“Eron Islom Respublikasi bizdan muzokaralarni davom ettirishni so‘radi. Biz bunga rozi bo‘ldik. Ammo AQSh ularga juda aniq qilib shuni aytdiki, o‘t ochishni to‘xtatish kelishuvi ENDI YO‘Q”.

Eron esa Trampning bu talqinini rad etdi. Davlat televideniyesi xabariga ko‘ra, Tehron AQShdan muzokara so‘ramagan, faqat Qatar vositachilarini qabul qilishga rozi bo‘lgan.

Reuters agentligiga vaziyatdan xabardor manbaning bildirishicha, Qatar vakillari juma kuni Eronda rasmiylar bilan keskinlikni pasaytirish va Hormuz bo‘g‘ozi masalasini gaplashgan.

Tramp yana bir bayonotida, agar Eron AQSh prezidentiga suiqasd uyushtirsa yoki bunga urinsa, AQSh armiyasi zudlik bilan zarba berishga shay turishini buyurganini yozdi.

U shunday dedi:

“1000 ta raketa Eronga uchishga tayyor. Agar Eron AQShning amaldagi prezidentiga, ya’ni menga suiqasd qilsa yoki bunga urinsa, minglab qo‘shimcha raketalar ham darhol ishga tushiriladi”.

Trampning qo‘shimcha qilishicha, buyruqlar allaqachon berilgan. Zarurat tug‘ilganda AQSh harbiylari bir yil davomida (kerak bo‘lsa, bu muddat uzaytiriladi) butun Eronni tamomila yakson qilishga tayyor.

Trampga suiqasd tahdidi qayerdan chiqdi?

The Wall Street Journal va boshqa AQSh ommaviy axborot vositalarining yozishicha, Isroil yaqinda Eron Trampga suiqasd uyushtirish rejasini ishlab chiqqani to‘g‘risida razvedka ma’lumotlarini Vashingtonga taqdim etgan.

10-iyul kuni Eron oliy rahnamosi Oyatulloh Ali Xomanaiyning dafn marosimida minglab odamlar qatnashdi. Ularning ayrimlari qo‘llariga “Biz Trampni o‘ldiramiz” degan yozuvli bannerlarni ko‘tarib olgan edi.

Hormuz bo‘g‘ozi – diplomatiya markazida

Eron tashqi ishlar vaziri Abbos Aroqchi Hormuz bo‘g‘ozi orqali kemalarning xavfsiz harakatlanishini muhokama qilish uchun Ummonga tashrif buyuradi. Bu haqda ISNA agentligi xabar berdi.

AQSh Hormuz bo‘g‘ozidagi barcha dengiz yo‘laklari ochiq bo‘lishi va u yerdan o‘tish uchun hech qanday to‘lov olinmasligini istamoqda.

Urush davomida Tehron Hormuz bo‘g‘ozi ustidan nazoratni qo‘lga olgan va shu sababli AQSh bilan mojarosi boshi berk ko‘chaga kirib qolgan.