Энди Трамп президентлик мавқейидан ҳам “соққа” қилиши мумкин

АҚШ президенти Доналд Трампга тегишли ижтимоий тармоқ компанияси унинг постларини бошқалардан олдин кўриш имконияти учун ойига 100 минг доллар тўлов жорий этишни кўриб чиқмоқда.

Бироқ янги механизм жиддий баҳсларга сабаб бўлди. Танқидчилар бунинг ҳукумат фаолияти очиқлигига тўсқинлик қилишини ва Трампга президентлик лавозимидан яхшигина даромад олиш имконияти беришини таъкидлашмоқда.

17 июль куни Reuters ахборот агентлиги Truth Social веб-сайтига эгалик қилувчи Trump Media and Technology Group компанияси молиявий трейдерлар ва фирмалардан Трампнинг постларига биринчи кириш ҳуқуқи учун юқори ҳақ олишни муҳокама қилганини маълум қилди.

Хабарга кўра, уч йиллик шартнома тузадиган компаниялар учун ойига 60 минг долларлик арзонроқ тариф ҳам кўриб чиқилган.

Демократияга таҳдид

Truth Social таклифи эълон қилинган заҳоти танқидларга учради. Трамп узоқ йиллардан буён ҳукуматдаги мавқейидан шахсий манфаати йўлида фойдаланишда айбланади. 

Мутахассислар фикрича,  бундай пуллик хизмат этика нуқтаи назаридан АҚШ демократияси фаолиятига хавф туғдиради.

Трампнинг бу ҳаракати президент сифатида қилаётган ишларига оид маълумотларни сотиш, деб баҳоланди.

Трамп нега Truth Social'га ўтган?

Трамп президентлик даврида ижтимоий тармоқлардан фаол фойдаланган. Биринчи президентлик муддатида у Twitter (ҳозирги Х) платформасининг энг фаол фойдаланувчиси эди.

Аммо Трампнинг 2020-йилги президентлик сайловлари юзасидан асоссиз даъволари ҳамда 2021 йил 6 январдаги АҚШ Конгресси биносига уюштирилган ҳужумдан сўнг бир нечта платформа унинг аккаунтларини блоклаган.

Шундан кейин Трамп ўз медиа компаниясига сармоя киритди. Ҳозир у "Trump Media and Technology Group" компаниясининг назорат пакетига эгалик қилади.

Truth Social компаниянинг асосий маҳсулотларидан бири ҳисобланади. Трамп 2021 йилда Тwitter'ни тарк этганидан буён деярли фақат шу платформадан фойдаланиб келмоқда.

У Эрон бўйича ҳарбий зарбалардан тортиб савдо сиёсатидаги ўзгаришларгача бўлган муҳим қарорларни айнан Truth Social орқали эълон қилади.