Isroil va Livan o‘t ochishni to‘xtatish bo‘yicha kelishuvga erishdi

AQSh bilan har qanday kelishuv shartlari orasiga Isroil va Livan o‘rtasidagi janglarning to‘xtatilishini ham kiritgan Tehron avvalroq Quvaytga zarba berib, uning aeroportiga shikast yetkazgan va 60 dan ortiq odamni jarohatlagan edi. Shu bilan birga, AQSh harbiylari Hormuz bo‘g‘ozi yaqinida zarbalar amalga oshirgan.

Isroil va Livan o‘rtasidagi o‘t ochishni to‘xtatish kelishuvi Eron bilan ittifoqdosh bo‘lgan “Hizbulloh” harbiylashgan guruhini to‘xtatishga hamda uning barcha jangarilarini Janubiy Litani sektoridan olib chiqib ketishga bog‘liq.

Bu haqda Vashingtondagi muzokaralar yakunida AQSH Davlat departamenti e’lon qilgan qo‘shma bayonotda aytilgan.

O‘tgan oy ikki tomon o‘t ochishni to‘xtatishga kelishib olsa-da, jangovar harakatlar davom etayotgan edi. Isroil Tehronni qo‘llab-quvvatlab chegara ortidan o‘q uzgan Livan jangari guruhi – “Hizbulloh”ni ta’qib qilib, mart oyida Livanga bostirib kirgandi.

Eron Islom inqilobi posbonlari korpusi Quvayt aeroportini o‘qqa tutmaganini ma’lum qilib, vayronagarchilikka nishonga tegmagan AQShning tutuvchi raketalarini sababchi qilib ko‘rsatdi.

AQSh harbiylari esa bu ma’lumotni inkor etib, Eron dronlari aeroportni qasddan nishonga olganini bildirdi.

Isroil hamon Livanga zarbalar bermoqda

Urush asosan Eron va Livanda minglab odamlarning o‘limiga sabab bo‘ldi, energiya ta’minoti va boshqa yuk tashishlarni jiddiy izdan chiqarib, jahon iqtisodiyotiga zarar yetkazdi.

Chorshanba kuni Isroil dronlari Livan janubida kamida olti kishining hayotiga zomin bo‘ldi va Bayrut janubidagi bir avtomobilni nishonga oldi. Isroil esa “Hizbulloh” tomonidan uchirilgan vositani tutib qolganini ma’lum qildi.

Aroqchi, agar Isroil Bayrutga hujum qilsa, Eron qat’iy javob qaytarishini aytdi.

"Aqldan ozgan" Netanyahu

Tramp urush bo‘yicha kengroq kelishuvga erishish maqsadida Livan mojarosi yuzasidan bo‘lib o‘tgan telefon suhbatida Isroil Bosh vaziri Benyamin Netanyahuni “aqldan ozgan” deb ataganini tan oldi.

“Bir payt men unga: “Bibi, buni to‘xtatishimiz kerak. Biz buni bas qilishimiz kerak”, dedim”, – dedi Tramp Netanyahuni laqabi bilan tilga olib.

Netanyahu esa CNBC telekanaliga bergan intervyusida Tramp bilan gohida “taktik kelishmovchiliklar” bo‘lib turganini, ammo Eronga oid asosiy masalalarda ular hamfikr ekanini bildirdi.