Isroil harbiy samolyotlari Livan janubiga hujum uyushtirdi

Livan Milliy axborot agentligining ma’lum qilishicha, 7-sentyabr kuni erta tongda Isroil harbiy samolyotlari Livan janubi Kfar Reman shaharchasidagi turar joy binosiga zarba berishi natijasida to‘qqiz kishi, jumladan, ikki nafar bola vafot etgan, yana besh kishi jarohatlangan. Bu haqda Al-Jazira nashri yozdi.

Shuningdek, Isroil armiyasi Livan janubidagi Deyr az-Zahroniy shahrida aholi yashaydigan hududga majburiy evakuatsiya buyrug‘i berganidan so‘ng, tunda zarba berdi. Harbiylarning ta’kidlashicha, ular “Hizbulloh” obyekti yaqinidagi binoni nishonga olgan.

Bu hujumlar Isroilning Nabatiya tumanidagi Arab Salim shahriga uyushtirgan havo hujumlari oqibatida kamida yetti kishi halok bo‘lib, yana 20 kishi yaralanganidan bir kun o‘tib sodir bo‘ldi.

Iyun oyida AQSh vositachiligida Isroil va Livan o‘rtasida “tajriba zonasi” kelishuviga erishilganiga qaramay, hujumlar davom etmoqda.

“Al-Jazira” muxbiri Zayna Xodrning so‘zlariga ko‘ra, tajriba zonalari Livan armiyasi tomonidan “Hizbulloh”ni qurolsizlantirish va isroilliklar tomonidan hududni tark etish uchun sinov maydoni bo‘lib xizmat qilishi ko‘zda tutilgan.

Biroq Isroil Livan janubidagi o‘nlab qishloqlarni hamon egallab turgani holda qo‘shinlarini olib chiqib ketishdan bosh tortgan va bu diplomatik jarayonning “turg‘unlikka” yuz tutishiga olib kelgan.

Livan Sog‘liqni saqlash vazirligining ma’lum qilishicha, mart oyi boshida mojaro kuchayganidan buyon Isroilning Livanga bergan zarbalari oqibatida 4350 dan ortiq kishi halok bo‘lgan va 12 300 dan ziyod odam jarohatlangan.

Vazirlikning so‘nggi hisobotida qayd etilishicha, 2-martdan beri Isroil Livan tez yordam guruhlariga 179 marta hujum qilgan, buning natijasida 135 nafar tibbiyot xodimi hayotdan ko‘z yumgan.