Rossiya 200 nafar tojikistonlik mahkumani vataniga qaytaradi

Rossiyaning inson huquqlari bo‘yicha vakili Tatyana Moskalkova mamlakat qamoqxonalarida jazo muddatini o‘tayotgan 200 nafarga yaqin tojikistonlik ayolni o‘z vataniga qaytarish bo‘yicha Emomali Rahmondan ijobiy javob olganini ma’lum qildi.  

Moskalkova Tojikiston prezidentiga maktub yo‘llab, insonparvarlik nuqtayi nazaridan ayollarga jazoni o‘z yurtida o‘tash uchun ruxsat berishini so‘ragan.

Uning ta’kidlashicha, aksariyat hollarda jinoyat sodir etilgani tasdiqlansa-da, jazo har doim ham eng og‘ir darajada bo‘lishi shart emas.

“Ba’zan kechirimli bo‘lish insonning tuzalishiga, pushaymon bo‘lishiga va yaxshi tomonga o‘zgarishiga yordam beradi. Shu bois biz ayollar uchun yengillik beruvchi asoslarni har bir ishda topishga harakat qilamiz”, – dedi u.

Xorijlik mahbus ayollarning oila a’zolari bilan uchrashish imkoniyati cheklangani, qarindoshlaridan jo‘natmalar qabul qilishda muammolar mavjudligi sababli Moskalkova Tojikiston rasmiylariga murojaat qilgan.

U Rossiya jazoni ijro etish tizimidagi islohotlar doirasida hibs sharoitlari yaxshilanayotganini, xususan. zo‘ravonliksiz jinoyat sodir etgan yosh bolali ayollarga nisbatan sudgacha qamoqqa olish chorasini cheklovchi qonunni alohida ta’kidladi.

Shuningdek, Moskalkova 14 yoshga to‘lmagan farzandi bor ayollar uchun jazo muddatini kechiktirish amaliyoti joriy etilganini e’tirof etdi.

Shu oy boshida Moskalkova Rossiya o‘z hududida sudlangan 3 mingdan ortiq O‘zbekiston fuqarosini jazoni o‘tash uchun vataniga topshirishga tayyorligini ma’lum qilgan edi.

Biroq huquqiy to‘siqlar, jumladan, O‘zbekistonning 1998-yilgi “Mahkumlarni topshirish to‘g‘risida”gi konvensiyani ratifikatsiya qilmagani sababli bu jarayon to‘xtab qolmoqda, deb xabar berdi The Times of Central Asia nashri.