Xitoydagi choʻl ostida ulkan suv manbalari topildi

Geologlar Xitoydagi eng katta choʻl ostida ikkita yirik suv manbasini aniqlashdi. Yerosti suvlari Shinjon-Uygʻur muxtor tumanidagi Taklamakon sahrosida olib borilayotgan qidiruv loyihasi doirasida topildi, deb xabar berdi South China Morning Post.

Hozirda ushbu qurgʻoqchil vohada keng koʻlamli koʻkalamzorlashtirish va choʻllanishga qarshi kurash ketmoqda. Yangi suv manbalaridan biri harakatlanuvchi qumliklar boʻyicha dunyoda ikkinchi oʻrinda turadigan Taklamakonning janubi — Minfen tumanidagi Andir qishlogʻi hududidan topilgan boʻlsa, ikkinchisi sahro bagʻridagi Mozortogʻ janubiy qismidan chiqdi.

Olimlar ushbu loyiha doirasida shoʻrxok suvlardan foydalanish boʻyicha maxsus sinov stansiyasini tashkil etishdi. Bunday suv tarkibidagi tuz miqdori oddiy ichimlik suvidagidan koʻp, ammo dengiz suvidagiga qaraganda kamroqdir. Undan sahro chegaralari boʻylab ekinlarni sugʻorish va qum koʻchishining oldini olishda foydalanish koʻzda tutilgan.

Ma'lumot uchun: Taklamakon (ma'nosi — tark etilgan makon, joy) choʻli maydoni 337 600 kvadrat kilometrni tashkil etadi, ya'ni kattaligi boʻyicha deyarli Germaniya bilan teng. Koʻchib yuruvchi qum barxanlari va oʻta ogʻir iqlimi tufayli choʻl mahalliy aholi orasida «oʻlim dengizi» nomini olgan. Ammo keyinchalik «dengiz» nomi oʻzini oqladi: 2015-yilda sahro tubida yashiringan ulkanummon aniqlandi. Bu yerdagi suv hajmi Shimoliy Amerikadagi beshta Buyuk koʻlning umumiy suv miqdoridan ham koʻp.

Qum boʻronlarining oldini olish va mahalliy infratuzilmani himoya qilish maqsadida, sahro atrofida daraxtlar, butalar va quyosh panellaridan iborat uzunligi 3 050 kilometrlik ulkan yashil belbogʻ barpo etilgan.