Tramp Ontario ko‘li nomini “Amerika ko‘li” deb o‘zgartirdi

AQSh prezidenti Donald Tramp 27-avgust kuni Ontario ko‘li nomini “Amerika ko‘li” (Lake America) deb o‘zgartirdi. Bu haqda Reuters yozdi.

Shimoliy Amerikaning beshta Buyuk ko‘llaridan biri – Ontario ko‘liga oid farmon faqat AQSh federal idoralari tomonidan qo‘llaniladi. Kanada, xalqaro organlar yoki boshqa tashkilotlarning ko‘lni qanday atashini belgilamaydi.

Tramp bayonotidan bir necha soat o‘tib, Kanada bosh vaziri va Nyu-York shtatining demokrat gubernatori 400 yildan oshiqroq tarixga ega nomni o‘zgartirmasliklarini ma’lum qildi. Nyu-York AQSH tarafidan ko‘l bilan chegaradosh.

“Biz Ontario ko‘li nomini darhol Amerika ko‘li deb o‘zgartiramiz. Ko‘l nomining o‘zgarishi, ya’ni Amerika ko‘li, aslida, men uzoq vaqtdan beri o‘ylab yurgan narsa edi”, – dedi Tramp jurnalistlarga.

Bu harakat Kanada bilan ziddiyatni yanada kuchaytirdi. O‘tgan hafta AQSH va Kanada o‘rtasidagi savdo muzokaralari barbod bo‘lib, bunda har ikki tomon bir-birini aybladi.

“Amerika o‘zgarmoqda”

Kanada Bosh vaziri Mark Karnining ta’kidlashicha, ko‘lning nomi Kanada va AQSH davlat sifatida tashkil topishidan ancha avval paydo bo‘lgan.

“Biz Amerikaning o‘zgarayotganini bilamiz. Bu savdo munosabatlari, tashqi siyosati, milliy yodgorliklari, gidronimlarida namoyon bo‘lmoqda. Shuningdek, kanadaliklar haqiqatni – avval ham, hozir ham va har doim uni Ontario ko‘li deb atashni bilishadi”, — dedi Karni ijtimoiy tarmoqlarda.

Ontario ko‘li yuzasining qariyb 52 foizi Kanadaga, qolgan qismi esa Nyu-York shtatiga qarashli.

Nyu-York gubernatori Keti Hokul ijtimoiy tarmoqda munosabat bildirib, Nyu-York uni yangi nom bilan atamasligini aytdi.

Kanada va Nyu-York shtati bilan chegaradosh Vermont shtatining respublikachi gubernatori Fil Skott Trampning qarorini “arzimas va umidsiz” deb baholadi.

“Bizga endi okean kerak”

Payshanba kuni Tramp okeanlar nomini o‘zgartirishni ham taklif qildi.

“Bizda ko‘rfaz ham, ko‘l ham bor, endi bizga faqat okean kerak. Shunday ekan, balki Atlantika yoki Tinch okeani nomini almashtirishimizga to‘g‘ri kelar. Balki ikkalasini ham o‘zgartirarmiz”, – dedi Tramp jurnalistlarga.

2025-yil boshidan buyon Tramp Kanadani AQShning 51-shtatiga aylanishi borasida bir necha bor aytgan, biroq Kanada rahbarlari bu fikrni bema’nilik deb atagan.

Tramp lavozimiga qaytganidan buyon o‘z nomini ham Vashingtondagi mashhur imoratlar, harbiy-dengiz kuchlarining yangi turkumdagi kemalari, badavlat xorijliklar uchun mo‘ljallangan viza dasturi, hukumatga qarashli dori-darmonlar veb-sayti hamda bolalar uchun ochiladigan federal jamg‘arma hisobvaraqlariga berishga harakat qilib ko‘rdi.

Bundan tashqari, 2025-yil yanvarida Meksika ko‘rfazi nomini Amerika ko‘rfaziga o‘zgartirishni buyurdi.