Xitoyda prezervativlar uchun soliq oshirildi

Xitoyda 1 yanvardan boshlab aholi soni qisqarishiga qarshi qaratilgan yangi soliq siyosati amalga kiritildi. 

Yangi tartibga koʻra kontratseptiv vositalar — prezervativlar tugʻilishni nazorat qiluvchi dori-darmonlar va shu kabi mahsulotlarga 13 foizlik savdo soligʻi joriy etildi. Bu haqda BBC xabar berdi.

Maʼlum qilinishicha islohotlar doirasida bolalar bogʻchalari nikoh bilan bogʻliq xizmatlar va keksalar parvarishi qoʻshilgan qiymat soligʻidan ozod etilgan. Shuningdek hukumat avvalroq ota-onalar uchun taʼtil muddatini uzaytirish va moliyaviy yordamlar ajratish imkoniyati ham koʻrib chiqilayotganini maʼlum qilgan edi.

Demografik inqiroz fonidagi qaror

Rasmiy maʼlumotlarga koʻra Xitoy aholisi soʻnggi uch yil davomida muntazam kamayib bormoqda. 2024 yilda mamlakatda atigi 9,54 million chaqaloq tugʻilgan boʻlib bu koʻrsatkich oʻn yil oldingi darajaning taxminan yarmiga teng. Shu sababli Pekin yoshlarni oila qurishga va farzand koʻrishga undash maqsadida qator choralarni amalga oshirmoqda.

Ayni paytda 1994 yildan buyon amalda boʻlgan «bir oila — bir farzand» siyosati davrida joriy etilgan ayrim soliq imtiyozlari bekor qilinmoqda.
Jamoatchilik munosabati
Kontratseptiv vositalarga soliq joriy etilishi jamiyatda turli bahslarga sabab boʻldi. 

Ayrim mutaxassislar bu qaror istalmagan homiladorlik va OIV tarqalishi xavfini oshirishi mumkinligidan xavotir bildirmoqda. Boshqalar esa farzand koʻrish qaroriga «qimmatlashgan prezervativlar» hal qiluvchi taʼsir koʻrsatmasligini taʼkidlab hukumat choralarini tanqid qilmoqda.

YuWa aholini tadqiq qilish instituti hisobotiga koʻra, Xitoy farzand tarbiyasi eng qimmatga tushadigan mamlakatlar qatoriga kiradi. Bunga taʼlim sohasidagi yuqori toʻlovlar ayollar uchun ish va onalikni bir vaqtda olib borish qiyinligi hamda koʻchmas mulk inqirozi sabab yoshlar orasida kelajakka ishonchning pasayishi asosiy omil sifatida koʻrsatilgan.

Maʼmuriy nazorat kuchaymoqda

Ayrim provinsiyalarda mahalliy amaldorlar ayollarga qoʻngʻiroq qilib ularning hayz sikli va farzand koʻrish rejalari haqida soʻrov oʻtkazayotgani haqida ham xabarlar tarqalgan. Yunnan provinsiyasi sogʻliqni saqlash boshqarmasi buni «boʻlajak onalarni aniqlash uchun zarur maʼlumot» deya izohlagan.