Олимпиада кундалиги: Ўзбекистон юнон-рум кураши бўйича Олимпиадани медалсиз якунлади

Кечаги баҳсларда спортнинг юнон-рум кураши бўйича бронза медали учун -77 кг вазн тоифасида гиламга чиққан Арам Варданян Арманистон вакили Малхас Амоян билан курашиб, 6:5 ҳисобида имкониятни бой берди. Шу тарзда Варданян Париж Олимпиадасини бешинчи ўрин билан якунлади. 

Орадан бироз вақт ўтиб, юнон-рум кураши бўйича Рустам Ассакалов -97 кг вазн тоифасида Олимпиаданинг учинчи рақамли спортчиси бўлиш учун жангга кирди. Унга бу босқичда кубалик Габриэль Кинделан рақиб бўлди. Тенг курашлар остида кечаётган баҳсда Рустам кутилмаганда жароҳат олди ва жангни муддатидан аввал якунлади. Натижада жанг кубалик курашчи фойдаси ҳал бўлди ва якунда Рустам Ассакалов ҳам Олимпиадани бешинчи поғонада якунлади. 

Кун беллашувларини бокс мусобақаларида иштирокини давом эттираётган Токио Олимпиадаси чемпиони Баҳодир Жалолов хушхабар билан якунлаб берди. Олимпиаданинг энг оғир вазнидаги жангларда иштирок этаётган Жалолов ярим финалда германиялик Нельви Тиафакка қарши рингга кўтарилди. Уч раунд давом этган жангда Баҳодир Жалолов Германия вакилига ҳеч қандай имконият қолдирмади ва кетма-кет иккинчи бор Олимпиада финали йўлланмасини қўлга киритди. Нельви Тиафакка Париж Олимпиадасининг бронза медали билан қаноатланишига тўғри келди. Жалоловга 11 август куни кечадиган финал баҳсида испаниялик Аюб Гадфа рақиб бўлади.

Маълумот ўрнида, ҳозирга қадар 4 нафар ўзбекистонлик чарм қўлқоп усталари Ҳасанбой Дўсматов, Лазизбек Муллажонов, Асадхўжа Мўйдинхўжай ва Баҳодир Жалоловлар финал йўлланмасини қўлга киритган. Яна бир нафар спортчи эса финал йўлланмаси учун курашади.