Attestatsiya imtihonlarini yechib bergan “bunker” faoliyati fosh etildi

 Bu haqda DXX maʼlum qildi.

Davlatobod tumanidagi umumtaʼlim maktabi direktori oʻrinbosari, Namangan davlat texnika universiteti boʻlim boshligʻi va mutaxassisi hamda ularning sheriklari attestatsiya testlariga kirgan oʻqituvchilarga moddiy manfaat evaziga yordam koʻrsatib kelgani fosh etilgan.

Oʻtkazilgan tezkor tadbir chogʻida “bunker” sifatida foydalanilgan xonadon koʻzdan kechirilib, test savollarini yechishda jalb etilgan 12 nafar pedagog aniqlangan. Shuningdek, bir necha noutbuk, 30 dona turli eshitish moslamalari, yashirin kameralar, 8 ta Wi-Fi router va boshqa jihozlar ashyovi dalil sifatida olindi.

Dastlabki tekshiruvlarga koʻra, gumondorlar 2024 yil sentabr–oktabr oylarida oʻqituvchilarning imtihon natijalarini ijobiy hal qilib berish vaʼdasi evaziga 1300–1500 dollar miqdorida pul talab qilib, umumiy hisobda 25 ming dollardan ortiq mablagʻ toʻplagan.

Mazkur holat yuzasidan Jinoyat kodeksining 168-moddasi 3-qismi “b” bandi hamda 28,211-moddasi 2-qismi “a” bandi bilan jinoyat ishi qoʻzgʻatildi. Tergov harakatlari davom etmoqda.

Maʼlum boʻlishicha, maktab direktori oʻrinbosari va “bunker”ni boshqargan 2001 yilda tugʻilgan shaxs avval ham shunga oʻxshash jinoyatlar uchun javobgarlikka tortilgan.