«Bu narsa toʻxtashi kerak»: Saida Mirziyoyeva Qibraydagi issiqxonada ekologik tekshiruv oʻtkazdi

 Bu haqda u oʻzining Telegram kanalida maʼlum qildi.

Mirziyoyevaga koʻra, reyd davomida tumandagi issiqxonalardan biri tekshirildi. Ushbu issiqxonada har kuni 150 kilogrammga yaqin koʻmir yoqilishi aniqlangan va bu holat atrof-muhitga jiddiy zarar yetkazayotgani qayd etildi.

Reyd chogʻida Prezident administratsiyasi rahbari issiqxona egasi bilan suhbatlashib, ekologik meʼyorlarga qatʼiy rioya qilish zarurligini taʼkidladi.

«Bizga odamlarning sogʻligi juda muhim. Bu narsa toʻxtashi kerak» dedi u tadbirkor bilan muloqot chogʻida.

Tadbirkor filtr oʻrnatish ishlari hosil mavsumining yakunlanishi tufayli kechikayotganini bildirdi. Shundan soʻng Saida Mirziyoyeva viloyat hokimi Zoyir Mirzayevga murojaat qilib masalani tezkor hal etishni soʻradi.

Mirzayevning aytishicha, tadbirkor uchun berilgan oxirgi muddat tugash arafasida: «Ertaga filtr olib kelinadi, sotib olinadi va oʻrnatiladi».

Saida Mirziyoyeva tadbirkorlarga zarur yordam koʻrsatish muhim ekanini taʼkidlab, zarurat boʻlsa subsidiya berish masalasini ham koʻrib chiqish lozimligini qayd etdi.

«Ekologiyaga yetkazilayotgan zarar moddiy manfaat bilan oqlanmaydi. Aholi sogʻligiga zarar har qanday iqtisodiy foydadan ustun» dedi Mirziyoyeva.

Xabarga koʻra, Ekologiya qoʻmitasiga bir kun ichida mazkur issiqxonaga zamonaviy filtr oʻrnatish vazifasi yuklatildi. Shuningdek, tadbirkorlar uchun seminar-trening va filtrlar savdo-koʻrgazmasi tashkil etilishi belgilab qoʻyildi.